Os drons, novas ferramentas para loitar contra os lumes
A Concellería de Seguridade Cidadá de Ponteareas estuda incorporar un dron como ferramenta para actuacións dos bombeiros.
Por Galicia Confidencial | Ponteareas | 06/12/2017 | Actualizada ás 11:00
Calquera cousa vale para tentar facer fronte aos lumes, especialmente, logo da terrible vaga de incendios do pasado outubro na que se queimaron 50.000 hectáreas e morreron catro persoas. De feito, diversos concellos están xa ensaiando distintas ferramentas para facer fronte as lapas, desde instalar canons de auga nos tractores ata utilizar drons.
Precisamente, a Concellería de Seguridade Cidadá do Concello de Ponteareas estuda o emprego de novas tecnoloxías e ferramentas como o dron para actuacións de emerxencia e para o desenvolvemento diario dos bombeiros de Ponteareas.
Así o sinalou este martes Vanesa Fernández. A concelleira de Seguridade Cidadá explicou que, para mellorar a calidade do servizo dos bombeiros e axilizar nas súas actuacións, están estudando incorporar o uso do dron.
Pero para iso, parte do persoal de bombeiros debería formarse nun curso básico de cincuenta horas de duración e nun curso avanzado de 70 horas teórico-práctico que lle permita obter a titulación de “piloto de RPAS (Remote Pilot Authorized System) homologado por AESA a través de ATO.
