Racha un dos tirantes que suxeitan o novo carril de Rande por un lume durante a obra
Outro dos tirantes quedou afectado ao producirse un conato de incendio mentres os operarios traballaban na estrutura.
Por E.P. | SANTIAGO DE COMPOSTELA | 14/12/2017 | Actualizada ás 11:49
Un dos tirantes que suxeitan un dos novos carrís en construción na ponte de Rande, na provincia de Pontevedra, rompeuse e outro quedou afectado ao producirse un conato de incendio mentres os operarios traballaban na estrutura.
Segundo informou o 112 Galicia, os feitos ocorreron sobre as 00,30 horas deste xoves, cando traballadores informaron de que, mentres realizaban operacións en varios dos tirantes da ponte, produciuse un lume no revestimento, facendo que rachase un cable e outro quedase afectado.
Aínda que os propios operarios dixeron que non precisaban os servizos de emerxencias, o 112 avisou aos Bombeiros do Morrazo. Fontes deste corpo explicaron que durante os labores dos operarios se produciu un quecemento que derivou no pequeno incendio.
Unha vez no lugar, os bombeiros procederon a apagar o lume con escuma e a arrefriar a estrutura e o corpo dos cables. Como consecuencia do aumento da temperatura polo incendio, un dos tirantes que suxeitan o novo carril soltouse e un segundo resultou afectado, pero se conseguiu estabilizar a tempo.
