Rande entra na historia como obra de infraestrutura e como unha das peaxes máis caras do Estado
A ampliación da histórica ponte na ría de Vigo custou 191 millóns. Un diñeiro que a adxudicaria cobrará ao longo dos vindeiros 20 anos con subas na peaxe. Rajoy, acompañado de numerosos cargos, inaugurou este sábado as obra dunha "ponte que quedaba pequena". Fotogalería no interior.
Por Galicia Confidencial | Vigo | 30/12/2017 | Actualizada ás 20:00
A Ponte de Rande entrou xa na historia da inxeñaría moderna por ser unha das obras de máis complexidade técnica e, sobre todo, por ser posible unha ampliación logo da súa construción. Pero tamén será famosa esta infraestrutura por ser unha das máis caras para os galegos xa que o seu custe será cuberto por aumentos continuos de un 1% da peaxe durante os vindeiros 20 anos.
De feito, este 1 de xaneiro xa se producirá a primeira suba. Será un 3,1% o que suba. E todo para pagar os 191 millóns de euros que custou a ampliación da ponte con máis tráfico de Galicia. Unha peaxe que cobra Audasa, a concesionaria, dunha autoestrada que segue sendo competencia do Estado e pola que leva cobrando desde 1973, tras conseguir unha nova prórroga por parte do Estado.
INAUGURACIÓN
E tal é a importancia que o Estado lle dá a esta infraestrutura, que pertence a Itínere, do Grupo Sacyr-Vallehermoso, que a inauguración da ampliación asistiron o presidente do Goberno, Mariano Rajoy, o presidente da Xunta, Alberto Núñez Feijóo, o ministro de Fomento, Íñigo de la Serna; a súa antecesora no cargo e actual presidenta do Congreso, Ana Pastor; e outras autoridades.
UNHA PONTE QUE “QUEDABA PEQUENA”
Durante a súa intervención na inauguración, Rajoy xustificou estas obras porque a ponte de Rande "queda pequena", e afirmou que a ampliación da capacidade da autoestrada neste tramo é unha "excelente noticia" para os municipios da contorna, e para as cidades de Vigo e Pontevedra.
Así mesmo, o titular do executivo galego, Alberto Núñez Feijóo, recoñeceu o labor dos gobernos que impulsaron e executaron esa obra (con mención a Zapatero, José Blanco, e a Ana Pastor e Íñigo de la Serna). Advertiu, en relación á AP-9, que é "imprescindible" unha "reflexión" sobre a peaxe que grava o tramo entre Redondela e Vigo, pero nada dixo da suba da mesma no 2018 e nos vindeiros anos.
A ese respecto, o presidente do Goberno confirmou que a comisión mixta creada sobre a xestión da autoestrada "estudará" esa cuestión na súa próxima reunión, no mes de xaneiro.
