Esquerda Unida acusa a Xunta de "desinformar" aos veciños do Porriño afectados polos problemas co lindano

Esquerda Unida acusou á Xunta de "desinformar e ter unha actitude de total desinterese" no problema da aparición de lindano no municipio pontevedrés do Porriño, á vez que denunciou que aínda non foi remitida ao Valedor do Pobo a documentación requirida ao Goberno galego e ao concello sobre os informes de contaminación.

Así o recolle un comunicado emitido este sábado no que Esquerda Unida afirma que a institución que dirixe Milagros Otero comunicou nos últimos días a 'EU-Son O Porriño' que as administracións local e autonómica non lle facilitaron a documentación requirida "a pesar de ser a súa obrigación".

No marco dunhas obras de remodelación do sistema de subministración de auga no Porriño detectouse lindano no chan de varios puntos do municipio, onde hai décadas estaba situada a fábrica da empresa farmacolóxica Zeltia. Esta sustancia, empregada até os anos 70 para a elaboración de fármacos, está prohibida na actualidade por ser prexudicial para a saúde e figura na lista de produtos canceríXenos.

Este sábado, a coordinadora de EU e deputada de En Marea no Parlamento galego, Eva Solla, alertou ante a "situación de abandono total" da Xunta cara aos veciños afectados por un problema que, ao seu xuízo, "debería ocupar" ao Goberno galego "as 24 horas do día".

"ASUNTO DE SAÚDE PÚBLICA"

Por tanto, instou ao Executivo que dirixe Alberto Núñez Feijóo a considerar a contaminación de lindano no Porriño como "un asunto de saúde pública de primeira magnitude".

"Vemos asombradas como seguen sen importar uns veciños abandonados e maltratados polas diferentes administracións que parece que non son capaces de articular unha estratexia conxunta para darlles unha solución", engadiu Solla.

Así as cousas, Esquerda Unida reclama as "responsabilidades penais, administrativas e políticas que corresponden" para os responsables da contaminación, así como que se destinen as partidas económicas necesarias para atallar o problema.