Buscan o autor da morte a tiros dun lobo en zona protexida
O animal foi atopado en zona 3 do Plan de Xestión do Lobo de Galicia, onde están prohibidas as batidas. Os Axentes Forestais e Medioambientais piden colaboración cidadá para atopar o responsable ou responsables da morte deste exemplar novo.
Por Galicia Confidencial | Pontevedra | 16/01/2018 | Actualizada ás 19:48
Un exemplar de lobo apareceu morto no monte no termo municipal de Portas con claros signos de ter sido abatido a tiros. A conta de Facebook Doc Portas publicou a imaxe, tomada por un veciño, do corpo do animal, atopado "no monte entre Valiñas e Romai con claros signos de ter sido unha morte violenta, con feridas profundas nos cuartos traseiros e no pescozo".
Os concellos de Portas e Barro, recordan, "están situados en zona 3 do Plan de Xestión do Lobo de Galicia", polo que "nunca se podería autorizar unha batida".
"De confirmarse que é un lobo e que morreu por arma de fogo, estariamos ante a morte dun animal protexido a mans de vingadores sen lei", denunciaron.
Pouco despois, Aprafoga (Asociación profesional dos Axentes Forestais e Medioambientais de Galicia) confirmaba que o exemplar atopado é un macho novo de lobo ibérico, morto por disparos, cuxo cadáver foi trasladado polos axentes ambientais ao Centro de Recuperación de Fauna Silvestre de Cotorredondo para facerlle a necropsia.
Os axentes están agora investigando a morte e piden axuda a quen poida ofrecer algún dato ou información sobre este caso.
Certo.Tratase dun macho novo d lobo ibérico,morto x disparos como se pode apreciar na 📷.Os #AxentesAmbientais xa trasladaron o cadáver o #CRFS d Cotorredondo pra q se lle faga a necropsia e están a investigar a súa morte.Se alguen ten algún dato sobre este caso q nolo faga saber pic.twitter.com/12FuTrRvnb
— Aprafoga (@APRAFOGA) 16 xaneiro 2018
