O Colexio de Xornalistas pide respecto á intimidade das persoas relacionadas co caso Diana Quer
Lembra aos medios de comunicación a necesidade de respectar o dereito ao anonimato, logo da denuncia dunha das vítimas do principal encausado que se sentía acosada polos xornalistas que agardan por ela diante da súa casa.
Por Galicia Confidencial | Compostela | 24/01/2018 | Actualizada ás 11:09
A Xunta de Goberno do Colexio Profesional de Xornalistas de Galicia lembrou este mércores a necesidade de respectar en todo caso a intimidade das persoas implicadas en feitos noticiosos e o seu dereito a se manter no anonimato e non fornecer información.
Unhas advertencias que chegan “fronte a algunhas malas prácticas constatadas nos últimos días” en relación ao caso Diana Quer, sobre todo, logo do acontecido coa muller que o Chicle supostamente tentou secuestrar en Boiro o pasado 25 de decembro e que provocou a súa detención esa mesma semana. Esta moza chamou ao xulgado de Ribeira para pedir protección fronte ao acoso dos medios de comunicación, apostados diante do seu domicilio.
O propio Código Deontolóxico do Xornalismo Galego recolle no seu sexto punto a necesidade de "recoñecer ás persoas individuais e/ou xurídicas o seu dereito a non proporcionar informacións nin responder preguntas, sen prexuízo do deber dos/as xornalistas de atender o dereito da cidadanía á información".
“O acoso á cidadanía para encher de información os medios de comunicación é unha práctica que non é compatíbel en ningún caso cun xornalismo profesional e responsábel, e menos aínda cando se trata de sucesos que poden provocar dor e secuelas”, suliña o Colexio de Xornalista que insiste en que este tipo de presións deben, pois, ser eliminadas do exercicio da profesión.
