Arco Iris denuncia que a avaría na refinaría da Coruña provocou "picos ilegais" de dióxido de xofre

A organización ecoloxista Arco Iris denunciou que a avaría eléctrica que se produciu este luns na refinaría de Repsol na Coruña, e que provocou unha densa fumareda negra, provocou "picos ilegais" de dióxido de xofre.

Nun comunicado, asegura, en concreto, que houbo "un aumento severo e prolongado dos niveis de SO2 en todas as estacións de control atmosférico das que dispón a rede municipal". Respecto diso, sinala que os valores obtidos "superan os límites de protección para a vexetación e foi susceptible de provocar episodios de choiva aceda".

Con todo, explica que as estacións dependentes de Repsol (Centro Cívico-A Grela e Pastoriza) e da Xunta (Riazor e Torre Hércules) "non ofrecen, curiosamente, datos do intervalo en canto a cifras de contaminación".

INFORMACIÓN AMBIENTAL

A organización engade que denunciou "en repetidas ocasións, esta intolerable situación, que trasgrede e viola todas as directivas europeas en materia de acceso á información ambiental e deixa aos cidadáns a mercede dunhas empresas cuxa carga contaminante está a afectar de forma continuada a toda a cidade".

Por todo iso, Arco Iris insta á Consellería de Medio Ambiente a integrar de "forma inmediata" a estación de Repsol e tamén a de Alcoa na rede de Meteogalicia en tempo real.