Por Europa Press / Redacción | Xerusalén (Israel) | 01/02/2018 | Actualizada ás 13:41
O presidente da Xunta, Alberto Núñez Feijóo, comezou este xoves o segundo día da súa viaxe a Israel visitando as instalacións de Mobileye, unha empresa tecnolóxica punteira que lidera o sector da automoción no país, onde presentou os avances de Galicia no eido da condución autónoma e abriu vías de colaboración co sector da automoción en Irsael, punteiro en innovación tecnolóxica a nivel mundial.
Xunto ao conselleiro de Economía, Emprego e Industria, Francisco Conde, e o director xeral do CTAG, Luis Moreno Diéguez, e da delegada do Estado da Zona Franca de Vigo, Teresa Pedrosa, Feijóo tivo ocasión de coñecer a traxectoria desta multinacional, dos proxectos nos que traballa actualmente e dos seus retos de futuro; así como mostrar a aposta que Galicia está facendo polo vehículo autónomo e por innovar na industria da automoción, co compromiso do Goberno e das principais empresas e centros de coñecemento.
Nesta liña, Feijóo subliñou a colaboración do Centro Tecnolóxico de Automoción de Galicia co grupo PSA no coche autónomo, lembrando que a primeira viaxe dun coche destas características que se realizou en España saíu da factoría de Balaídos, en Vigo. “O que acredita que a innovación en Galicia no sector da automoción vai un paso por diante doutras comunidades e que queremos seguir consolidando”, abundou.
Así mesmo, destacou o esforzo da Xunta en reproducir esta tendencia en todos os sectores, referíndose, como exemplo, á posta en marcha do Plan Innova que mobilizará ata 2020 preto de 1.800 millóns de euros.
Feijóo resaltou, ademais, que Galicia é líder na produción de vehículos comerciais en España –o segundo produtor europeo, despois de Alemaña-; de que 10 de cada 100 vehículos fabricados en España o son en Galicia; e de que os modelos de automóbiles que se comercializan no mundo polas marcas máis importantes utilizan compoñentes fabricados no noso país.
O presidente da Xunta fixo fincapé na oportunidade que supón esta xuntanza con Mobileye para coñecer de primeira man a tecnoloxía máis avanzada neste sector, e para invitar os representantes da compañía a visitar o sector galego da automoción e o CTAG, co obxectivo de avaliar posibles vías de colaboración en I+D. Non en van, Mobileye conta co laboratorio máis avanzado en tecnoloxía para o coche autónomo e a seguridade do condutor e o cidadán.
Mobileye é, na actualidade, líder mundial no desenvolvemento de visión artificial e aprendizaxe automático, análise de datos, localización e mapeo, base dos sistemas avanzados de condución asistida. Unha tecnoloxía que mantén os pasaxeiros máis seguros na estrada e que corrixe o factor humano como causa de accidentes de tráfico, reducindo así, os riscos.
ATRAER INVESTIMENTO DE EMPRENDEMENTO INNOVADOR
Alberto Núñez Feijóo visitou en Israel o principal foro de investimento internacional de micromecenado, o '2018 OurCrowd Global Investor Summit', para atraer investimentos de emprendemento innovador para Galicia. O Executivo galego destaca que se trata dunha cita de referencia mundial no ámbito do capital risco, onde se dan cita investidores de todo o mundo e 'startups'. Nela, ademais de atraer investimentos, Galicia busca colaboración e alianzas estratéxicas.
"Estamos a falar dun evento que rolda os 7.000 asistentes procedentes de máis de 80 países no que case 100 'startups' presentan os seus proxectos", destacou Feijóo, que sinala que é un foro que a Galicia lle interesa "desde o punto de vista económico e tecnolóxico".
Despois de incidir na oportunidade que supón para as empresas galegas coñecer as principais novidades dos sectores máis punteiros, así como contactar con investidores, o presidente da Xunta destacou que Galicia dispón dun bo número de aceleradoras en sectores estratéxicos nos que as empresas do país son referentes.
Así, citou a Bussines Factory Auto, en colaboración con PSA; ViaGalicia, con Zona Franca; Agrobiotech, na que colabora Coren; a incubadora de fármacos que promoven Janssen e a Fundación Kaertor; as dúas nas que participan Telefónica e Vodafone, no sector TIC; e a futura aceleradora que se porá en marcha no ámbito aeroespacial, aproveitando o potencial de Rozas; xunto cos proxectos que desenvolven as 30 Unidades Mixtas de Investigación.
FACILIDADES DA XUNTA
O máximo mandatario autonómico lembrou que en todas elas hai ideas e proxectos dispoñibles para investir e achegar coñecemento e fixo fincapé en que a Xunta está a realizar unha intensa política de impulso ao investimento no tecido produtivo, con facilidades fiscais, asesoramento e apoio financeiro.
"Calquera empresa que queira situarse en Galicia, que necesite financiamento, capital risco, axudas e inventivos da administración, ten á súa disposición a Xunta con ferramentas como a Oficina Doing Bussines ou a Lei de impulso industrial para facilitar as tramitacións burocráticas, e co Plan Innova 2020", indicou.
Sobre este último punto, resaltou que este plan, que conta cunha mobilización de case 1.800 millóns, está destinado á transferencia de coñecemento, á innovación e á creación e impulso das empresas. "Porque queremos acompañar ás ideas, ás 'starups', aos centros de coñecemento para que crezan, para que maduren e para que, posteriormente, teñan un impacto directo na creación de emprego", sinalou.
VISITA AO MUESO DO HOLOCAUSTO
Despois deste foro, o presidente do Goberno galego visitou o Museo da Historia do Holocausto, un lugar no que se lembran os maiores crimes da historia da Humanidade e réndese homenaxe ás vítimas.
Con esta visita, Feijóo finalizou a súa estancia en Israel, na que acompañou a unha vintena de empresas, clústeres e centros tecnolóxicos galegos nunha misión comercial por un dos países que máis inviste en innovación. Así, o 45% do seu PIB compono industrias de alta tecnoloxía, en sectores como o aeronáutico, o das telecomunicacións ou o da biotecnoloxía.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.