Por Galicia Confidencial | Pontevedra | 02/02/2018 | Actualizada ás 10:00
Eucaliptos por castiñeiros. Esa foi a elección da Comunidade de Montes de Lourizán que deciiu eliminar Monte do Catadoiro un total de 4 Has de eucalipto e plantar 250 pés de castiñeiro de froito.
O eucalipto desta parcela xa fóra cortado 3 anos atrás, pero ao tratarse dunha comunidade pequena, con poucos recursos, houbo que esperar a poder beneficiarse dunha subvención para poder levar a cabo a actuación. Neste caso, as axudas chegaron da Consellería de Medio Rural, a través de fondos europeos, concretamente, dos fondos FEDER, que cubre o 75% do total, que foi de case 7.000 euros.
“Como a entidade parroquial ten como política o non uso de herbicidas, o eucalipto xa cubrira novamente a parcela, polo que houbo que eliminalo co uso de medios mecánicos e manuais”, apuntan os comuneiros.
COGUMELOS
Para substituír ao eucalipto, elixiron o castiñeiro de froito, concretamente 50 pés da variedade Negral, e 200 da Parede, de 2 savias. “Todos os pés son micorrizados, que teñen un prezo moito máis elevado, coa perspectiva de que no futuro se converta nunha parcela rica en cogumelos”, din.
Nas próximas semanas, está previsto levar a cabo unha plantación de castiñeiros e carballos cos escolares da parroquia, nesta mesma parcela, para completar as 4 Has, que supoñen máis do 10% da superficie total dos montes veciñais de Lourizán.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.