Piden a nulidade do plan reitor das Fragas do Eume por "vulneración de dereitos fundamentais"

A avogada Pilar Martínez, en representación da asociación 'Unión da Propiedade para a Defensa das Fragas do Eume' e outros titulares de terreos afectados, vén de reclamar a nulidade do procedemento de inicio do Plan Rector de Uso e Xestión deste Parque Natural por "vulneración de dereitos fundamentais", ademasi de por "incumprimento da lexislación autonómica, estatal e europea, así como da xurisprudencia existente".

Fragas do Eume / flic.kr/p/473Hn5

A letrada, especializada en medio ambiente, considera que "o procedemento nace viciado de nulidade" ao "incumprir a normativas de participación pública e de acceso ao seu contido, ademais de perder vixencia a propia declaración do parque".

Pilar Martínez Avogados sostén que a propia declaración de Parque Natural e a súa declaración como Lugar de Interese Comunitario e Zona de Especial Conservación perderon vixencia, debido ao incumprimento dos prazos establecidos polas diferentes normativas, polo que argúe que non cabe a aprobación de ningún instrumento para a xestión dos mesmos.

Tras 21 anos desde a aprobación do PORN do espazo, 20 anos desde que se declarou o parque natural; 13 anos desde o proposta LIC, 11 anos desde que a Comisión aprobou o lista LIC; tres desde a declaración de ZEC, a letrada estima que, "ademais de incumprirse o prazo legal (dous anos no caso do PRUG do Parque Natural) para a aprobación dos plans, resulta obsoleta calquera avaliación sobre as esixencias de protección e conservación e así o determinou a xurisprudencia do Tribunal Supremo, entre outros", detalla.

Do mesmo xeito, "tamén resultan obsoletas as condicións económicas, sociais e culturais e as particularidades locais ou rexionais que no seu día levaron a declarar os espazos como parque ou a propoñer os LIC, cuxos plans de xestión e declaración de ZEC puidesen pretenderse con este instrumento", engade.

En calquera caso, lembra que máis do 80% do territorio incluído no Parque Natural Fragas do Eume pertence a particulares polo que "esta asociación debe ser chamada e consultada especialmente por ser moi representativa, tanto polo número de socios, como polo terreo que corresponde aos seus socios", comenta.

Malia isto, lamenta que se sometese a participación pública o devandito documento, sen participación algunha desta asociación.

No escrito de alegacións incídese en que o artigo 22 da Lei 42/2007 establece que “o procedemento de elaboración dos plans incluirá necesariamente trámites de audiencia aos interesados, información pública e consulta dos intereses sociais e institucionais afectados e das organizacións sen fins lucrativos que persigan o logro dos obxectivos desta Lei”.

Engade que hai xurisprudencia de anulación de plans de xestión noutras comunidades autónomas por incumprimento desta normativa.

A letrada tamén solicita a nulidade do procedemento por vulneración do dereito á participación baseándose na inaccesibilidade do documento por vía telemática e a ausencia de publicación no DOG, o que, apunta, "supón que a publicación ou sometemento a participación pública deste instrumento carece de garantía, ao non asegurar o acceso a todos os afectados polas canles obrigatorias que establece a lei".

OUTROS INCUMPRIMENTOS

Outro dos incumprimentos denunciados por Pilar Martínez é que "non consta a publicación de mapas indubitados con propostas de zonificación do espazo protexido, para que os cidadáns poidan identificar, sen dúbida, se as parcelas da súa titularidade están afectadas; tampouco existe un estudo científico previo, actualizado e rigoroso, que avale a necesidade das medidas, a súa eficacia e, en definitiva, as propostas dun determinado modelo de plan de xestión".

Advirte ademais a letrada que calquera Plan que se aprobe ten que ir acompañado da pertinente memoria económica. No escrito de alegacións, Pilar Martínez alude, entre outros, ao artigo 20 h da Lei 42/2007 que establece: “os plans de ordenación dos recursos naturais terán, como mínimo, o seguinte contido: memoria económica acerca dos custos e instrumentos financeiros previstos para a súa aplicación”.

Así mesmo, recorda que o documento orzamentario ten que ser real e ter en conta os dereitos subxectivos previamente consolidados dos cidadáns que, por ver afectados os seus bens e dereitos, deben ser descritos e identificados pola Administración, e deben ser chamados como interesados. Neste sentido tamén lembra que a Constitución avala a utilización racional dos recursos naturais, garantindo o principio de solidariedade colectiva e o dereito á igualdade, polo que "o instrumento de xestión non debe supoñer, en ningún caso, o estrangulamento económico da zona" e ten que "garantir a liberdade de empresa e o exercicio e a defensa da produtividade, así como o progreso social e económico, para unha distribución da renda rexional e persoal máis equitativa e orientada ao pleno emprego, atendendo a modernización e desenvolvemento dos sectores económicos, en particular, da agricultura, a gandería, a pesca e a artesanía da zona".

Finalmente, outro dos argumentos esgrimidos polo despacho de Pilar Martínez Avogados é que a lei establece que no caso de que convivan diferentes figuras de protección nun mesmo espazo, neste caso as propias do parque natural Fragas do Eume e da Rede Natura, o PRUG debe ser coordinado e unificado nun único documento integrado e a Administración pública debe aclarar, se o instrumento de xestión que se pretende aprobar será extensivo ou incluirá, non só o ámbito territorial do parque natural, senón as LIC e ZEC.

A letrada mantén, que o anuncio do 7 de decembro de 2017 (DOG 3/1/2018) sobre participación pública do documento de inicio do PRUG do Parque Natural das Fragas do Eume é "confuso a este respecto".

Pilar Martínez Avogados reclama, por todos estes "incumprimentos", a retirada do documento e a elaboración dun novo, no que “a participación dos afectados sexa real e efectiva, e, por suposto, se teñan en conta todos os dereitos previamente consolidados dos mesmos fomentando, por parte da Administración, un equilibrio entre a conservación do medio ambiente e o necesario desenvolvemento socioeconómico da zona”.