SANTIAGO DE COMPOSTELA | 10/02/2018 | Actualizada ás 18:11 por EUROPA PRESS
A banda folkórica Tiruleque presenta o vindeiro sábado na compostelá Sala Capitol o seu terceiro álbum, 'Outro que tal baila', un traballo composto por dez cancións que combinan composicións propias con versións do cancioneiro popular galego.
Ese mesmo día, o 17 de febreiro, é a data elixida para o lanzamento dun álbum que dá continuidade á filosofía desta banda: facer bailar ao público con música tradicional de Galicia.
'Outro que tal baila' conta con tres temas de composición propia de Tiruleque e outras seis versións de cancións tradicionais recollidas polos musicólogos Pablo Carpintero ou Alan Lomax, como a 'Muñeira de dous golpes' ou 'Asubíame de lonxe'.
O tema elixido para pechar o traballo é 'Muñeira de Lacón', gravada hai 15 anos e que se converteu na primeira aparición radiofónica de Tiruleque cando a Radio Galega emitiuna en 2005. A banda recupera esta canción como broche ao seu terceiro álbum grazas á colaboarción de Emilio Españadero, condutor do programa 'Lume na Palleira'.
Tiruleque naceu en 2002 coa unión de cinco novos que compartían inquietudes e unha traxectoria musical ligada ao folk. Ao longo destes anos a banda foi crecendo e engadindo novos músicos e instrumentos que axudaron a exceder os límites da música tradicional.
A banda publicou o seu primeiro traballo de estudo en 2009 --titulado co nome do grupo-- e catro anos máis tarde chegou 'Mu!!', o seu segundo álbum e, do mesmo xeito que o anterior, producido polo propio grupo.
Ao longo destes anos, Tiruleque compartiu escenario con algúns dos artistas máis importantes da esfera 'folkie', como Treixadura, Milladoiro, Xosé Manuel Budiño, Susana Seivane, Quempallou ou o biscaíño Kepa Junkera.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.