Por Galicia Confidencial | Arzúa | 18/02/2018 | Actualizada ás 10:00
O trampeo de raíñas. Ese é o mellor sistema na actualidade para loitar contra a vespa velutina, realizado de xeito xeralizado e coordinado. Foi o que concluíron as asociacións apícolas da Cornixa Cantábrica e Francia durante a celebración do Día do Apicultor, celebrado este sábado en Arzúa. Ademais, apostaron por ampliar a loita contra o tártago asiático noutros ámbitos distintos do apícola, pois para que sexa eficaz é preciso que se realice en todo o territorio e non só nas proximidades dos apiarios.
Unha das estratexias adoptadas polos apicultores para enfrontarse a esta especie invasora foi a unión. Por iso, e con ese obxectivo, creáronse as Plataformas Stop Velutina na Cornixa Cantábrica, para facer forza ante as administracións e conseguir que cheguen as reivindicacións do sector ós poderes competentes.
TRAMPAS
Así o transmitiron as Plataformas de Galicia, Asturias e Cantabria na xuntanza de Arzúa, incidindo en que unha das ferramentas que se está demostrando máis eficaz na actualidade é o trampeo de raíñas para evitar a formación de niños. Tamén a Unión Nacional de Apicultura Francesa publicou recentemente un documento, que se expuxo con detalle durante a sesión, no que explica que éste debe ser o principal método a implementar por parte das administracións para controlar a expansión deste insecto.
Por outro lado, para protexer os apiarios ante os ataques da velutina, os apicultores puideron coñecer as últimas novidades sobre o sistema da trampa eléctrica nunha completa exposición de diferentes fabricantes deste aparato. Dende a Asociación Galega de Apicultura, que apostan firmemente por este método, anunciaron que plantexarán á Consellería de Medio Ambiente a posibilidade de subvencionar a adquisición deste material, xa que o consideran moi necesario e teñen constancia por parte da Consellería que pode haber posibilidades dunha liña de axudas neste senso.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.