Por Galicia Confidencial | Pontevedra | 04/03/2018 | Actualizada ás 22:40
A Comisión Permanente da Comisión Estatal contra a Violencia, Racismo, Xenofia e a Intolerancia no Deporte decidiu propoñer unha sanción a un afeccionado do Pontevedra por amosar unha gran bandeira galega independentista durante o encontro que este equipo mantivo co Racing de Ferrol en Pasarón.
Segundo relata o xornalista David Espiño no xornal dixital pontevedraviva, foi na súa reunión do día 22 de febreiro, cando este órgano propuxo unha sanción para o afeccionado granate por “exhibir unha bandeira galega independentista creando entre os seguidores do equipo contrario unha gran axitación e alteración”.
A sanción proposta é de carácter leve cun importe de 500 euros, e prohibición de acceso a recintos deportivos durante 3 meses. Ademais rexistráronse incidentes previos entre as dúas afeccións antes do partido.
En numerosos foros futbolísticos criticouse esta proposta de sanción xa que son moitos os siareiros galegos que acuden aos campos con símbolos independentistas. De feito, é moi habitual ver bandeiras coa estrela vermella ou pancartas independentistas en Riazor e en Balaídos.
MÁIS SANCIÓNS
Por outra banda, Antiviolencia tamén recolle na súa resolución outra proposta de sanción correspondente ao choque entre pontevedreses e ferrolanos do pasado día 18 de febreiro, en concreto en relación aos incidentes previos ao encontro que obrigaron a intervir aos corpos de seguridade do Estado.
Neste caso, segundo o xornal dixital pontevedrés, proponse unha multa de 2.000 euros e a prohibición de acceso a un recinto deportivo durante 6 meses a un afeccionado que "guindou unha botella de cristal de cervexa cara aos axentes de Policía nos arredores do estadio".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.