A oposición acusa a Feijóo de presentar Galicia ante España como "país de contrabandistas"

A oposición e o PPdeG discreparon este luns na súa interpretación da entrevista do presidente, Alberto Núñez Feijóo, no programa 'Salvados', de La Sexta, tendo en conta que os seus rivais políticos viron a un dirixente "acurralado" e tamén "impaciente" por abrir a sucesión de Mariano Rajoy, pero o PPdeG discrepa e incide en que o líder dos populares galegos lle volveu a trasladar o seu "apoio".

"Dóeme e entristéceme, como galego, ver que a única referencia que houbo a Galicia e aos galegos foi para dicir que todos somos contrabandistas", sinalou o portavoz de En Marea, Luís Villares. Ao seu xuízo, é "inxusto" que "as únicas palabras que teña de agarimo" para "un país que lle deu todo á súa carreira política" sexan "para dicir" que os galegos son "todos contrabandistas".

"Non se se pensa o ladrón que todos son da súa condición, pero desde logo isto non é así", esgrimiu Villares, en referencia ás fotos de mediados da década de 1990 nas que Feijóo aparece co posteriormente condenado por narcotráfico Marcial Dorado, e que saíron a relucir durante a entrevista.

Segundo o dirixente de En Marea, no programa púidose ver "un Feijóo nervioso, impaciente por abrir a sucesión de Rajoy, até o punto dunha irreverencia tal de marcarlle un ano de prazo para que decida que fai co seu futuro".

"Esta desesperación deixa claro que todo o que pasou nos últimos meses tiña sentido: renunciar a reivindicar un financiamento xusto para Galicia, a transferencia da AP-9... as renuncias completas do país eran para a súa carreira persoal e vímolo clarisimamente. Víuselle moito o plumeiro e creo que tampouco lle beneficia a el", aseverou.

"QUE GOBERNE GALICIA"

Pola súa banda, en Vigo, o líder do PSdeG, Gonzalo Caballero, constatou que el viu a "un presidente acurralado e sen capacidade de resposta" mentres lle "ían sacando os incendios, a fenda salarial ou algunha foto da súa historia". "Creo que Feijóo estaba contra as cordas", sentenciou.

Caballero insistiu en que se viu a un Feijóo "sen capacidade de resposta e con pouca iniciativa", ratificando a imaxe de que "se vai perdendo pulso político" porque "o presidente está nunha fase de repregamento".

Sobre a sucesión de Rajoy, sinalou que "iso o teñen que valorar no PP", antes de reiterar que o presidente galego se mostrou "acurralado e en situación incómoda". Engadiu que a "prioridade" do PSdeG é "conseguir que Feijóo goberne en Galicia, que lle dea solucións aos problemas dos galegos, que atenda ás necesidades sociais, que dea solucións á Galicia real e ás cidades".

Neste sentido, asegurou que o PSdeG manterá "unha axenda a pé de país" que "obrigue" a Feijóo "a non esquecerse de que ten que gobernar e dar solucións aos galegos".

"ESTRATEXIA DE SUBMISIÓN"

Pola súa banda, a portavoz nacional do BNG, Ana Pontón, sostivo, na liña de Villares, que Feijóo debe "unha explicación" aos galegos porque "non é digno e é vergoñoso que o presidente, para tentar tapar a súa relación cun narco da ría de Arousa, presente a Galicia ante todo o Estado como un país no que hai contrabandistas".

"É indignante, perdeu todos os papeis", reprobou, convencida de que "o relevante" non é "se Feijóo quere ou non suceder a Rajoy" senón que Galicia ten un presidente que, "polas súas ambicións persoais", está a desenvolver "unha estratexia de submisión que conduce a Galicia á irrelevancia política".

Segundo Pontón, esta "estratexia de submisión" fai que Galicia "pague moi caro" as "ambicións persoais" do dirixente dos Peares, que "cala" en cuestións como a suba de peaxes na AP-9, que a comunidade quede "fóra do Corredor Atlántico de mercadorías" ou que "non sexa capaz de defender unha tarifa eléctrica propia".

"En definitiva, creo que deixa un Feijóo perseguido polo seu pasado, que non é capaz de explicar as súas relacións cun narco e que pon a súa ambición por enriba do interese de Galicia. Retratou moi ben a insolvencia e frivolidade coa que actúa o presidente", resolveu.

PP: "DEIXARSE DE 'LERIAS'"

Pola súa banda, tamén se pronunciou sobre un hipotético salto do presidente da Xunta á política estatal o portavoz do PPdeG na Cámara galega, Pedro Puy, pero cunha visión moi distinta á dos dirixentes da oposición.

En concreto, asegurou que, na entrevista, Feijóo afirmou que "non está por substituír a alguén que, de momento, non manifestou outra cousa que que quere terminar unha lexislatura complicada", en referencia a Rajoy.

Sobre esta cuestión, lembrou que o propio presidente da Xunta, preguntado en varias ocasións sobre o seu futuro político, pediu "deixarse de lerias" e "porse a traballar". "O que entendín é que o presidente —Feijóo— non está nese tema" e que o que di é que "apoia a Rajoy", apuntou.

Ademais, preguntado polas críticas de dirixentes da oposición que ven "vergoñoso" que Feijóo presentase a Galicia como "un país de contrabandistas" para "xustificar a súa amizade cun narco" (tanto Ana Pontón (BNG) como Luís Villares (En Marea) pronunciáronse neste sentido), Pedro Puy cualificou de "absurdas" estas declaracións.

"Non estou para comentar o que di a oposición que non ten ningún sentido. Todos os que vivimos unha época sabemos perfectamente o que era o tabaco de batea e iso é o que dixo o presidente", manifestou.

Respecto diso, aproveitou para celebrar que "afortunadamente" este tipo de prácticas "están abandonadas" e, do mesmo xeito que o tráfico de drogas, "non son ben recibidas pola sociedade".