Por Galicia Confidencial | Compostela | 06/03/2018 | Actualizada ás 13:45
O profesor Felipe Macías, catedrático de Edafoloxía e Química Agrícola da USC, deféndese das acusacións que un grupo de estudantes fixeron contra el por apoiar as novas actividades mineiras na explotación de Touro-O Pino.
Nun escrito remitido a GC, Macías destaca que leva máis de 30 anos de traballo en recuperación de chans de mina, “incluíndo a mina de lignito das Pontes, mina Touro, mina e accidente de Aznalcóllar, Mina Saelices, mina Sao Domingos, vertedoiros con ampelitas en dous túneles do AVE, etc”. E suliña que, durante a súa conferencia non lle faltou o respecto a ninguén.
Refírese a charla que hai uns días impartiu na Facultade de Química da USC baixo o título: “Touro: un novo proxecto de explotación mineira. Consecuencias ambientais”. Moitos dos asistentes agardaban que se falaran das repercusións da mina pero, segundo un grupo de estudantes que escribiron ao GC, o conferenciante “empregou fotografías de manifestantes contra a mina para mofarse e fixo unha serie de comentarios despectivos e ata insultantes cara xornalistas e medios comunicativos chamando mentiras a datos contrastados, moitos deles incluídos no propio informe sobre o proxecto da empresa”.
Ademais, criticaron que este profesor ten “un contrato de colaboración con empresas como TEN, fabricante de tecnosoles (tecnoloxía para a recuperación dos terreos danados pola mina), ou Francisco Gómez y CIA e Explotaciones Gallegas, as dúas directamente relacionadas coa explotación da mina”.
SOBRE A CONFERENCIA
Macías destaca que leva 47 anos de docencia universitaria e “xamais insultou” a ningún dos seus alumnos en clases ou conferencias. “Había na sala unhas 80 persoas, a case totalidade estudantes de grao, master e doutoramento, xunto a algúns profesores. A conferencia durou máis de hora e media e foi seguida con total atención, felicitándome un gran número dos presentes”, dixo.
“Incluso un xornalista presente dixo que conferencias como esa eran necesarias para a formación da opinión pública. Só 5 das persoas presentes manifestaron dalgunha maneira a súa crítica e obxeccións”, indicou.
Esta é toda a súa misiva:
Sr. Director de Galicia confidencial
Ola Xurxo. Pódolle anticipar que levo 47 anos de docencia universitaria e xamais insultei a ningún dos meus alumnos en clases ou conferencias. Había na sala unhas 80 persoas, a case totalidade estudantes de grao, master e doutoramento, xunto a algúns profesores. A conferencia durou máis de hora e media e foi seguida con total atención, felicitándome un gran número dos presentes. Incluso un xornalista presente dixo que conferencias como esa eran necesarias para a formación da opinión pública. Só 5 das persoas presentes manifestaron dalgunha maneira a súa crítica e obxeccións. A crítica máis forte que expuxo un dos presentes centrouse en que terminei a miña presentación falando do ?humidal reactivo de Bama? e as súas funcións, estrutura que fixemos no ano 2004 e que foi publicada en diferentes medios e recoñecida por moitísimos especialistas mundiais. Ao terminar de explicar as funcións do humidal reactivo de Bama presentei a imaxe que aparecía nos medios de comunicación da pancarta á beira do humidal. Non creo que recoller algo que os seus autores divulgaron na prensa sexa un insulto.
Por outra banda, asegúrolle que a miña exposición se produciu a solicitude da Decana da Facultade de Química quen me dixo que a solicitaron moitos alumnos. En ningún caso fíxena pola miña iniciativa, e o que nela afirmei é o froito de máis de 30 anos de traballo en recuperación de chans de mina, incluíndo a mina de lignito das Pontes, mina Touro, mina e accidente de Aznalcóllar, Mina Saelices, mina Sao Domingos, vertedoiros con ampelitas en dous túneles do AVE, etc. Os traballos de recuperación da mina Touro foron visitados desde o ano 1999 á actualidade, por centos de especialistas mineiros, profesores e alumnos universitarios de Bioloxía, Xeoloxía, Química, Enxeñaría Química, Ecoloxía, Enxeñaría Ambiental, Enxeñeiros Agrónomos, Enxeñeiros Forestais de máis de 40 países, alumnos das Universidades de Santiago, Vigo, Miño, Murcia e París, alumnos de Secundaria (Instituto Rosalía) e de primaria (Colexio San Jorge, Centro escolar de Ponteceso,..), celebráronse dous congresos científicos no 2001 e 2014 de membros das Sociedades de Ciencia do Chan de España e Portugal con sesións específicas sobre os traballos realizados, realizáronse varias teses doutorais e traballos fin de master e numerosas publicacións científicas e presentacións en congresos nacionais e internacionais. Hai bastantes cousas que contar, sen necesidade de insultar a ninguén, e, por suposto, convídolle a coñecelas se é o seu desexo.
Atentamente
Felipe Macías Vázquez
Catedrático de Edafología e Química Agrícola da USC
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.