Emilio Cao: “Sufrín a represión do Goberno do PP nas miñas carnes”
Asegura que cinco antidisturbios se botaron enriba del e o aplastaron cos seus escudos. A Fiscalía pide, agora, que sexa condenado a 5 anos e 8 meses de cárcere e ao pago dunha multa de 600 euros.
Por Galicia Confidencial | Compostela | 19/03/2018 | Actualizada ás 15:20
O 22 de marzo de 2014 decenas de miles de persoas, chegadas de todo o Estado e convocadas polas marchas da Dignidade, encheron as rúas de Madrid. Pedían "pan, traballo e teito". Pero antes de que rematara a manifestación comezaron altercados e a policía cargou contra os e os mobilizados. Houbo 24 persoas detidas, tres galegas, e entre elas estaba Emilio Cao, do Carballiño, que entón tiña 17 anos, e que foi acusado de agresión e atentado á autoridade.
“Eu fun o que sufrín a represión do Goberno do PP nas miñas carnes por defender demandas democráticas como é pan, traballo e teito”, apunta Emilio Cao. Así, lembra que os disturbios comezaron en horario legal da protesta e que o agredido foi el. “Hai fotos que se me ve a min con cinco antidisturbios enriba aplastándome cos seus escudos. Penso que nesa posición sería imposible que agredira a ningún policia, nin resistirme, nin nada. Esa acusión desmóntase por iso soa”, apunta neste vídeo de Lentes Diverxentes.
A Fiscalía pide, agora, que sexa condenado a 5 anos e 8 meses de cárcere e ao pago dunha multa de 600 euros. Emilio Cao, que estuda Filosofía na Universidade de Santiago, destaca que a súa vida quedaría "completamente esnaquizada" de confirmarse a condena.
