Premio europeo á recuperación do bosque autóctono galego
A European Outdoor Conservation Association recoñece o proxecto realizado en Froxán para plantar 10.000 árbores autóctonas nun terreo antes ocupado por eucaliptos e outras especies invasoras.
- Substitúen eucaliptos en Lousame por máis de 1.000 árbores autóctonas
- Máis de 200 persoas financian un bosque autóctono nunha zona inzada de eucaliptos tras os lumes do 2006
Por Galicia Confidencial | Santiago de Compostela | 04/04/2018 | Actualizada ás 15:29
A comunidade de montes de Froxán e o colectivo Coluna Sanfíns están de noraboa. O seu proxecto de recuperación ambiental de 20 hectáreas de monte para bosque autóctono foi o gañador do concurso internacional da European Outdoor Conservation Association.
Até 150 proxectos de restauración ambiental de todo o mundo participaron nos últimos meses neste concurso, cuxo premio, financiado con 30.000 euros, permitirá levar a cabo nestes montes a repoboación con 10.000 árbores autóctonas nun terreo antes ocupado por eucaliptos e outras especies exóticas invasoras.
A comunidade veciñal de montes de Froxán (Lousame), que tamén forma parte da plataforma Cousa de Raíces, traslada o seu agradecemento a todas as persoas que contribuíron na consecución deste premio e anima a sociedade a participar nos labores de restauración que se leven a cabo na comunidade a partires de agora. Desde Cousa de Raíces, tamén trasladan a súa noraboa.
