Pontón cre que "non ten encaixe" as ameazas do Supremo se non sobe a luz en Galicia

Pontón critica así que o Tribunal Supremo ameace con medidas coercitivas ou indemnizatorias se o Ministerio de Enerxía non sobe a factura da luz aos galegos repercutindo os impostos autonómicos que soportan as empresas eléctricas. O ultimato do Alto Tribunal é para Ana Pontón un "auténtico disparate" e unha "burla a Galicia", segundo valorou este xoves nunha comparecencia ante os medios na cidade de Pontevedra.

Pontón entende que trasladar aos consumidores os 70 millóns de euros que desembolsan as eléctricas polo canon de saneamento, o de contaminación atmosférica, o dos encoros e o eólico, supón un "abuso" que as administracións públicas "non poden permitir baixo ningunha circunstancia". Neste contexto, acusou ao presidente da Xunta, Alberto Núñez Feijóo, de ser "cómplice e responsable" desta situación.

Para Ana Pontón este segundo auto de execución de sentenza do Supremo demostra que os "tentáculos" das compañías eléctricas, ademais do Consello de Ministros, chegaron ao poder xudicial. A nacionalista afirmou que o Goberno da Xunta logrou que Galicia "non só non teña ningún beneficio" por ser unha das grandes produtoras de enerxía eléctrica, senón que "consegue" que os galegos paguen "máis".

COMPARECENCIA DO CONSELLEIRO

Ana Pontón anunciou que o BNG pedirá a comparecencia do conselleiro de Economía, Emprego e Industria, Francisco Conde, para que explique no Parlamento por que o Goberno galego "sempre negou" que a súa política impositiva fose a producir un aumento no custo da tarifa eléctrica.

A líder do Bloque anunciou "unha ofensiva parlamentaria" para conseguir que Galicia se beneficie de ser produtora de enerxía. Así, a Cámara autonómica debaterá o vindeiro martes unha proposición de lei presentada polo BNG para demandar unha tarifa eléctrica galega que suporía un desconto do 15% na factura da luz, aproveitando que Galicia é unha comunidade excedentaria.