A factura da luz, a política forestal e as pensións, temas que se debaterán no pleno desta semana

A factura da luz, a política forestal de cara á nova temporada de alto risco de incendios, as pensións e a educación superior serán algúns dos temas que os deputados do Parlamento galego debaterán no pleno que arrinca o martes.

A Xunta de Portavoces fixou a pasada semana a axenda da próxima sesión plenaria, na que comparecerá o conselleiro de Economía, Francisco Conde, para informar as directrices de enerxía; así como a titular de Medio Rural, Ángeles Vázquez, que abordará o futuro da Política Agraria Común (PAC).

O pleno comezará en martes co debate da toma en consideración de dúas leis. Así, o Bloque defenderá unha proposición de lei para dotar a Galicia dunha tarifa eléctrica propia que permita reducir a factura da luz nun 15%. Ademais, En Marea, pedirá derrogar a reforma da Lei Xeral de Seguridade Social que aproba o factor de sustentabilidade das pensións.

Así mesmo, na sesión de control do mércores, os nacionalistas preguntarán ao presidente da Xunta, Alberto Núñez Feijóo, pola política forestal ante o inicio do período de alto risco de incendios e En Marea pediralle explicacións sobre as cifras de execución dos orzamentos de 2017 en materia de formación para desempregados.

Pola súa banda, os socialistas reclamaranlle a implicación da Xunta para garantir o acceso igualitario aos estudos de máster públicos. Todo despois do escándalo sobre a lexitimidade do título da presidenta da Comunidade de Madrid, Cristina Cifuentes.

PENSIÓNS

No pleno, ademais da proposición de lei de En Marea sobre pensións, tamén debateranse iniciativas do BNG e PSOE sobre esta materia. Así, os nacionalistas proporán a subida das non contributivas a través do incremento do complemento autonómico en 100 euros mensuais das prestacións que non chegan aos 400 euros. Pola súa banda, os socialistas esixirán "pór freo" á perda de poder adquisitivo das pensións e vincular a súa revisión ao IPC.

Os socialistas tamén inclúen na orde do día distintas iniciativas en materia de educación e unha proposición non de lei para esixir á Xunta que estenda a gratuidade do transporte público para mozos ao sector rural.

A iso súmanse as medidas de En Marea para loitar contra a discriminación por xénero no ámbito laboral ou a petición da anulación da subida das peaxes da AP-9 ao seu paso pola Ponte de Rande.

Pola súa banda, os populares defenderán demandar ao Goberno central a inmediata posta en marcha da Tarxeta Social Universal, así como que a Xunta desenvolva o Plan Estratéxico da Conserva Horizonte 2020 e inicie a elaboración do Plan Estratéxico do Conxelado. Ademais, tamén se interesarán pola ampliación do Hospital de Montecelo en Pontevedra.