Afundido un pesqueiro en Ribadeo con dous tripulantes rescatados

Os dous tripulantes dun pesqueiro foron rescatados este luns despois de afundirse en Ribadeo (Lugo) á altura da Piñeira, supostamente debido a unha vía de auga, informou o 112 Galicia.

Por E.P. | LUGO | 23/04/2018 | Actualizada ás 13:48

Comparte esta noticia

Ás 10,00 horas deste luns o 112 recibiu a chamada do persoal da confraría de pescadores de Ribadeo que indicou que unha embarcación con dous tripulantes a bordo estaba indo a pique e que os dous tripulantes xa foran recollidos por outro barco da zona.

Ría do Eo
Ría do Eo | Fonte: cronistasoficiales.com

Por iso, o servizo de emerxencias pasou aviso a Salvamento Marítimo e informouse á sala de Gardacostas de Galicia, á Guardia Civil e aos efectivos de Protección Civil da localidade. O mesmo alertante indicou que as dúas persoas tiñan moito frío, polo que serían necesarios medios sanitarios. Por ese motivo, tamén se puxo en alerta a Urxencias Sanitarias, que desprazou ao porto de Ribadeo unha ambulancia medicalizada.

Persoal de Salvamento informou ao 112 Galicia de que o afundimento se produciu entre Rinlo e a entrada da Ría de Ribadeo, fronte aos Placebos. Tratouse dunha embarcación de madeira de nove metros de eslora dedicada ás artes menores, con base en Ribadeo.

Os dous náufragos foron trasladados polos servizos sanitarios ao centro de saúde da localidade con síntomas de hipotermia. Un deles recibiu o alta e o outro foi derivado até o centro hospitalario Jarrío, en Asturias, por ser natural de Navia.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta