Por E.P. | SANTIAGO DE COMPOSTELA | 23/04/2018 | Actualizada ás 15:20
A plataforma Queremos Galego convocou para o próximo 17 de maio, Día das Letras Galegas, a tradicional manifestación, que nesta ocasión buscar "levantar o artigo 155" que manteñen a Xunta e o Goberno estatal coa lingua galega e reivindicar o seu uso "sen obstáculos". A convocatoria foi presentada este luns nun acto no que participaron a coordinadora da manifestación, Mónica Pazos; o portavoz de Queremos Galego e presidente da Mesa Pola Normalización Lingüística, Marcos Maceira, e a viceportavoz do BNG no Parlamento autonómico, Olalla Rodil.
A responsable das mobilizacións destacou o carácter "festivo" que a plataforma dará a esta xornada, polo que convidou a que "tódalas persoas" leven instrumentos musicais para que sexa unha manifestación "chea de alegría".
Pola súa banda, o portavoz de Queremos Galego presentou o cartel co que a plataforma celebrará o 17 de maio, que foi deseñado pola ilustradora coruñesa Xulia Pisón e que inclúe o lema 'En galego día a día'.
Ademais, Maceira explicou que existe "un número crecente de persoas enfrontadas a barreiras" e á "falta de seguridade" que necesitan para utilizar a lingua galega. "O único que atopamos son obstáculos e trabas", declarou.
"ARTIGO 155 LINGÜÍSTICO"
Neste sentido, o tamén presidente da Mesa esgrimiu que en Galicia existe aplicado un "artigo 155 lingüístico" co que os gobernos de Mariano Rajoy e de Alberto Núñez Feijóo levan a cabo "políticas lingüicidas".
Así, tachou de "propaganda" as medidas previstas pola Xunta neste ámbito e instou o Goberno autonómico a comezar por "eliminar as prohibicións do uso do galego e a consideración como lingua estranxeira no ensino".
A pesar de todo iso, Maceira asegurou que a participación nas mobilizacións será "masiva" porque, na súa opinión, a sociedade ten unha "visión positiva" da lingua. E é que o 17 de maio é, para Queremos Galego, o día das persoas "que falan galego habitualmente" e as que "non teñen a seguridade" para facelo.
Pola súa banda, Rodil garantiu o apoio do BNG ás mobilizacións, nas que os nacionalistas "formarán parte como tantas outras veces". Por último, apelou ao "orgullo de pertenza a unha terra con lingua propia" para acudir ás manifestacións e defender o galego non só o 17 de maio, senón "os 365 días do ano".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.