Por Galicia Confidencial | Compostela | 24/04/2018 | Actualizada ás 10:40
É un colectivo de máis de 7.000 traballadores que levan 8 anos perdendo salario e dereitos laborais. Por iso, o profesorado de centros concertados decidiu organizarse e comezar a reclamar melloras nas súas condicións de traballo.
E, coma acontece no campo da xustiza, tamén aquí todos os sindicatos están unidos para reclamar o que cren que lles roubaron nos últimos anos. Así, os representantes de todos os sindicatos do Ensino Concertado (FSIE, FeSP-UGT, CCOO Ensino, FEUSO e CIG Ensino) continuarán coas súas accións reivindicativas ante a falta de resposta por parte da Administración as súas peticións. Por iso, este mércores delegados de toda Galicia do Ensino Privado Concertado concentraranse ante a Consellería de Educación e entregarán por rexistro máis de cinco mil sinaturas esixindo negociación na Educación Concertada.
O pasado día 4 deste mes solicitaron por escrito no rexistro da consellería a convocatoria da Comisión Tripartita do Ensino Privado Concertado (CTEPC) e o silencio foi a única resposta da Administración ata agora. Por iso os sindicatos volven á rúa para facer escoitar as peticións dos máis de 7.000 traballadores e traballadoras deste sector.
DENUNCIAS
“Non temos Acordo de Mantemento de Emprego dende o ano 2009, e a perda de unidades suporá un maior paro”, denuncian os sindicatos. Lembran os recortes salariais soportados por este colectivo nos últimos anos, consolidados en nómina, e a desaparición da paga extraordinaria de antigüidade dos 25 anos, que non se aboa dende o 2010, “sendo Galicia a única comunidade autónoma do Estado que non a paga, sendo un dereito recoñecido por xurisprudencia reiterada”.
Ademais, critican que, a diferencia dos centros públicos, non se aboe a coordinación de dinamización lingüística, incumprindo a propia lexislación da Xunta de Galicia. “Cremos que chegou o momento de empezar a negociar un acordo de mantemento de emprego, un acordo de aboamento da PEA e un calendario de equiparación salarial e de condicións laborais, así como o pago da coordinación de dinamización lingüística que non están a cobrar os traballadores/as do ensino concertado”, avisan.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.