Por X.M. Fernández | Mondoñedo | 27/04/2018 | Actualizada ás 20:54
As Quendas naceron cunha feira franca libre do imposto das alcabalas alá polo século XVI, sendo este trabuco o máis importante do Antigo Réxime pois gravaba o comercio e proporcionaba grandes ingresos á Facenda Real. Pasando por moi malas épocas en canto a prestixio, eclipsadas sempre polas San Lucas, as festas empezaron a coller pulo da man da Asociación As San Lucas presidida por Miguel Souto e integrada por grandes activistas culturais entregados sempre a tan nobre misión de exaltar a importancia social e intelectual de Mondoñedo.
A día de hoxe son xa unha festa de “obrigado cumprimento” na Mariña cun programa de actividades que a converte nunha festa total, nun parque de atraccións para os sentidos. Tal é así que o mesmo vídeo promocional que a asociación está facendo correr polas redes sociais emprega o espertar dos sentidos para referirse á temática das diferentes actividades que completan o programa. Nas Quendas goza o padal coas xornadas gastronómicas da carne de poldro, o mercado de produtos do campo, as polberías, a Festa da Empanada; gozan os oídos co monólogo de Touriñán, os coros, os grupos de gaitas e as grandes orquestras; goza tamén a vista co concurso hípico, o teatro, a gran feira cabalar, a primeira xuntanza de vespas, lambrettas e motos clásicas; e goza o corazón co “Mondoñedo é poesía”… Un auténtico “festival dos sentidos” ou como sempre se lle chamou en Mondoñedo: Feiras e Festas de “As Quendas 2018”.
O comezo oficial será mañá sábado pola noitiña, coa recepción e acompañamento da pregoeira Ruth Chao dende a Casa do Concello ata o Auditorio Pascual Veiga onde terá lugar o pregón sobre as 20.30 h. A continuación farase o acto simbólico de acendido do arco conmemorativo dos cento vinte e cinco anos da chegada da luz eléctrica a Mondoñedo.
O domingo 29 de abril comezan as xornadas gastronómicas de carne de poldro galego, celebrándose tamén a primeira xuntanza de vespas, lambrettas e motos clásicas e a exhibición de concurso hípico de salto. Chegados ao luns 30 o protagonismo correrá a cargo do actor e humorista Xosé Antonio Touriñán que ofrecerá dous pases do seu monólogo “Manolo Lojo” no Auditorio Pascual Veiga.
O peche das festas, martes primeiro de maio, destaca pola Festa da Empanada que chega á súa trixésimo quinta edición, a Gran Feira de gando cabalar no Campo da Feira, o espectáculo de monicreques polas rúas e “Mondoñedo é poesía” en diferentes localizacións da cidade rematando co recital poético musical no Auditorio Pascual Veiga de 18.30 a 20.00 h.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.