Por E.P. | SANTIAGO DE COMPOSTELA | 14/05/2018 | Actualizada ás 13:15
Esquerda Unida (EU) fai unha aposta "decidida" por unha confluencia "o máis ampla posible" no ámbito da esquerda para as próximas municipais, en procura da "unidade popular" con "total lealdade" e as denominadas 'mareas' como "eixo político absolutamente central".
Así o ratificaron este luns a coordinadora nacional do partido, Eva Solla, e o secretario de organización, Rubén Pérez, que son deputada por En Marea no Parlamento galego e concelleiro e portavoz do grupo municipal da Marea de Vigo, respectivamente.
En rolda de prensa, Pérez explicou que EU celebrará primarias para elixir os seus candidatos en asembleas locais os próximos 11 e 12 de xuño. Nestas votacións poderá votar un censo composto por máis de 3.000 persoas, xa que a formación abrirá a porta aos simpatizantes neste proceso.
Pola súa banda, o secretario de organización lembrou a coordinadora nacional que EU celebrou o 24 de marzo e referiuse á federal, que tivo lugar esta fin de semana, con "avances de cara á confluencia" e ás próximas citas coas urnas. Así, recalcou a "tremenda importancia" das municipais nun marco estatal e tamén do conxunto da Unión Europea, onde identificou unha "regresión" pola presenza da dereita.
AGE E AS MAREAS
Con esa aposta "decidida" pola "unidade popular" cuxo comezo situou en 2012 na comunidade galega, con AGE (Alternativa Galega de Esquerda) e despois en 2015 coas 'mareas' municipalistas, Rubén Pérez celebrou a "noticia histórica" de que "por fin" este posicionamento o asume Izquierda Unida (IU) no conxunto estatal.
En concreto, este sábado, a asemblea político e social de IU aprobou os documentos 'Basees para a confluencia electoral 2019' e 'Cara ás eleccións de 2019: participación, programa e primarias', entre os que figura a petición a Podemos de que o nome de IU apareza nas futuras alianzas electorais no caso de que non se acorde "un nome común".
Para a conxuntura de Galicia, o secretario de organización de EU subliñou que as "marcas" que xa existen --Compostela Aberta, Marea Atlántica, Marea de Vigo, Ferrol en Común...-- é "absolutamente necesario" que se manteñan. En canto ao ámbito comunitario, avogou tamén por favorecer unha candidatura "ampla e plural" dentro do conxunto estatal, porque o que "se xoga" é "que sexa a maior delegación" no contexto europeo.
"CON INDEPENDENCIA DE COMO SE CHAMEN"
Pola súa banda, Eva Solla incidiu na aposta por facilitar confluencias "o máis amplas posibles", non só con organizacións políticas, senón tamén con colectivos sociais. Con ese fin, indicou que EU celebrará unha coordinadora en xuño, para desenvolver un debate sobre a proposta programática da formación, "desde a esquerda" e para "confluír".
Por último, sinalou que, "con independencia de como se chamen" os distintos "escenarios", Esquerda Unida "ten capacidade" para achegar as súas propostas e a experiencia dos seus cargos públicos.
Como "antesala" dos próximos comicios xerais, chamou a profundar en iniciativas "concretas e solventes" como a "remunicipalización" de servizos e o emprego público para, en suma, "recuperar as cidades para a maioría social" antes de facelo co Goberno central.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.