O BNG denuncia que Galicia paga os hidrocarburos "máis caros"

O BNG denunciou que os galegos pagan os hidrocarburos "máis caros" de todo o conxunto estatal, unha realidade da que culpou "directamente" ao presidente autonómico, Alberto Núñez Feijóo, ao que reclamou que "tome cartas no asunto" e corrixa unha situación que provoca "unha dobre discriminación" para Galicia.

Nunha rolda de prensa celebrada este luns en sede parlamentaria, a líder frontista, Ana Pontón, apuntou que a Xunta conta con mecanismos para paliar unha situación que cre derivada das "políticas" impulsadas desde o Goberno galego polo Executivo de Feijóo, como a suba dos impostos nos orzamentos de 2014 ou o decreto de 2015 sobre gasolineiras.

Deste xeito, argumentou que, sen estas medidas, Galicia non ocuparía os postos "de cabeza" no prezo dos hidrocarburos, o que xera unha "dobre discriminación" para os galegos que, ademais de ter "os salarios máis baixos do Estado", non reciben ningún tipo de "compensación" por albergar na súa comunidade a refinería da Coruña.

Ademais, apuntou que o impacto dos prezos do combustible "non só ten efecto nas familias", senón que se estende "á competitividade" da economía galega, especialmente, no apartado de exportacións derivada da "situación xeográfica" de Galicia.

Por iso, reclama que o Goberno galego impulse "medidas estruturais" para reverter esta situación, que cre motivada, ademais de polas cargas impositivas sobre os carburantes "que deben ser baixadas", pola existencia dun " oligopolio" no sector das gasolineiras "que é posible evitar a través da acción pública".

"INVASIÓN DE COMPETENCIAS"

"A política ten que servir para actuar", incidiu Pontón, quen, a continuación, alertou do "agasallo envelenado" que "esconden" os Orzamentos Xerais do Estado para 2018 e que supón, ao seu xuízo, "unha invasión de competencias" ao establecer "o tipo impositivo máis alto" para os carburantes.

Así as cousas, instou a "non permitir esta invasión de competencias" ao presidente galego, a quen tamén reclama "medidas" que ten na súa man para facer fronte ao problema do prezo dos hidrocarburos en Galicia. "Só fai falla vontade", resolveu.