A RAG sobre Moreno: "Protagonizou unha proeza nun tempo e espazo que esixía determinación"

O académico numerario da Real Academia Galega (RAG) Xesús Alonso Montero subliñou que María Victoria Moreno, homenaxeada no Día das Letras Galegas 2018, "protagonizou unha auténtica proeza nun tempo e un espazo que esixía clara determinación", ao adquirir un "insólito compromiso cívico e literario" co galego.

No acto central polo Día das Letras Galegas, celebrado en Pontevedra, tamén a académica Fina Casalderrey definiu a Moreno como "un vento da terra que, polo seu compromiso no vivir, adquire a nacionalidade galega en tempos nos que o vento non é precisamente brisa".

Así mesmo, a académica Marilar Aleixandre indagou na reflexión de María Victoria Moreno sobre o dilema das mulleres ante o rol de dedicarse a unha arte ou unha profesión, no seu caso escritora e profesora, e ser ama de casa. Un conflito ao que se enfrontou ela mesma, dixo Aleixandre, xa que Moreno "viuse obrigada a escoller entre pasar o ferro ou escribir", e comparou esta situación coa situación do galego.

Neste acto, fixéronse reiteradas mencións e encomios á neta de María Victoria Moreno, Victoria Feijóo, quen no acto institucional celebrado previamente recitou un poema, e á que o presidente da Xunta, Alberto Núñez Feijóo, referiuse como "a flor máis querida de María Victoria". "Non sei se recitou antes de hoxe, senón, hoxe nacía unha rapsoda", engadiu Alonso Montero.