Beatriz Sestayo anuncia que non será a candidata do PSOE á Alcaldía de Ferrol en 2019

A secretaria xeral do PSOE en Ferrol e portavoz municipal, Beatriz Sestayo, anunciou este venres que non será a candidata socialista á Alcaldía nas próximas eleccións municipais de 2019.

Nunha rolda de prensa ofrecida na tarde deste venres e na que estivo acompañada polos integrantes da súa executiva, Sestayo deu a coñecer esta decisión que, segundo indicou, está "moi reflexionada e meditada".

Na súa comparecencia na sede da agrupación local do PSOE de Ferrol, a tamén exparlamentaria autonómica asegurou que deixa o "tempo suficiente" para facilitar o recambio e "lograr unha Alcaldía" socialista na cidade.

"Unha decisión que tomei pensando no ben do Partido Socialista e da cidade", manifestou antes de considerar "necesaria unha alternativa de esquerdas solvente". Ademais, a portavoz do PSOE no Consistorio ferrolán xustificou a súa decisión pensada no "interese" do partido, na "procura de consensos e unanimidades", así como nun "bo clima" para traballar a favor da Alcaldía socialista.

AGRADECEMENTOS

Na súa intervención, a socialista agradeceu á súa familia o apoio dado ao longo destes anos e mostrou o seu desexo de "tratar de recuperar unha vida privada, familiar e tamén laboral, para poder realizar proxectos que actualmente son inviables".

Así mesmo, Sestayo tivo palabras de recoñecemento para a executiva galega e o secretario xeral, Gonzalo Cabllero, polo "apoio" e a "liberdade absoluta" para tomar a decisión que "quixese tomar".

Ademais, referiuse aos socialistas ferroláns como a súa "segunda familia", "tanto aos integrantes da executiva como ao resto", por apoiala, así como "á trincheira do grupo municipal, unha pequena familia que con traballo e moitas horas" tenta "compensar á cidade de Ferrol".

NOVO CANDIDATO

Na rolda de prensa, Sestayo incidiu en que a designación do candidato á Alcaldía de Ferrol será por eleccións primarias, un proceso interno para o que aínda non hai data concreta. "Será fixado por Ferraz e a executiva galega", sinalou. "Desde hoxe mesmo xa nos pomos a buscar á persona que aglutine o mellor do noso partido", destacou Sestayo, que puxo en valor a canteira dos socialistas ferroláns.

Por último, asegurou que o aspirante á Alcaldía contará coa súa lealdade como secretaria xeral do PSOE en Ferrol.