Por X.M. Fernández | Monforte de Lemos | 26/05/2018 | Actualizada ás 10:00
No acto de presentación do evento no Centro do Viño da cidade do Cabe estiveron presentes os responsables das diferentes formacións políticas do goberno local, o alcalde José Tomé Roca e o Presidente do Consello Regulador da D.O. Ribeira Sacra, José Manuel Rodríguez. A xornalista local e locutora de Onda Cero, Manola Porto, fixo de mestra de cerimonias dando paso no momento oportuno tanto a Tomé como a José Manuel para que presentaran os detalles do festival aos alí presentes.
O mandatario local explicou que o festival naceu o pasado ano coa vontade de permanecer no tempo e coa idea de promocionar conxuntamente os viños e as adegas das cinco subzonas da Denominación de Orixe celebrando unha especie de fin de curso. En palabras de Tomé “o sector vitivinícola é clave para nós, serve de motor para a economía de Monforte e de toda a Ribeira Sacra. Todo isto viñémolo facendo sabendo compaxinar a tradición da viticultura tradicional coa innovación tecnolóxica”.
Pola súa parte, o Presidente do Consello Regulador, José Manuel Rodríguez, destacou que “a D.O. superou as súas vodas de prata e existía unha sensibilidade para celebrar en Monforte, capital da Ribeira Sacra, un evento destas características, pero iso si, tendo en conta que a nosa comarca é moito máis que viño”.
O cartel promocional do Festival do Viño é o mesmo que o ano anterior porque, segundo indicou o alcalde, ademais de ser bonito axuda a manter unha identidade e idea de marca, xa confirmaron presenza no encontro 24 adegas que ofrecerán os seus mellores caldos aos visitantes e o programa de actividades está totalmente pechado.
Programación do Festival da Ribeira Sacra 2018
Na liña do ano anterior a intención é crear un programa de propostas culturais variadas: rutas turísticas, música, gastronomía, artesanía, animación infantil… actividades que xiran arredor do verdadeiro protagonista que é o viño.
O Festival do Viño ofrecerá ao longo de 3 días unha oportunidade única para coñecer as paisaxes da “viticultura heroica” con varias rutas turísticas que se poderán realizar os días 6 e 7 de xullo, actividades para os máis pequenos, postos de artesanía e concertos na Praza España para a noite. O venres 6 estarán no escenario Najla Shami e Sons do Douro e o sábado 7 a música correrá a cargo de Davide Salgado e Pedro Pascual e A Banda da Loba.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.