O PPdeG di que hai que sentir "vergoña" e "pedir desculpas pola Gürtel", pero seguirá apoiando a Rajoy

O secretario xeral do PPdeG, Miguel Tellado, admitiu este venres sentir "vergoña" despois da sentenza da 'Gürtel', á vez que defendeu que o partido ten que pedir "desculpas", pero tamén trasladou o "apoio claro e sen dúbidas" da formación que lidera Alberto Núñez Feijóo ao presidente do Goberno, Mariano Rajoy.

"Ninguén pode dubidar da súa honradez e honorabilidade", sentenciou, á vez que rexeitou "leccións" do PSOE e considerou "sorprendente" que o "renovador" Pedro Sánchez sexa o que presente unha moción de censura, cando "ten a Manuel Chaves e José Antonio Griñán sentados no banco" dos acusados polos ERE de Andalucía.

Preguntado acerca da postura de Ciudadanos, suxeriu que sería "bo" que un dirixente "tan importante como Villegas se informe", dado que non se poden convocar eleccións xerais unha vez que foi rexistrada a moción de censura. Engadiu que aos populares galegos "non lles sorprendería" que Cs "quixese facer presidente a Sánchez", posto que "xa" o tentou "antes".

Á marxe das eleccións, acerca de se o seu partido debería emprender unha renovación canto antes, contestou que "renovarse é unha obriga" para todas as formacións políticas. Iso si, recalcou que "o PP ten que medir os seus tempos" e non deixar que os impoñan Cs ou o PSOE.

Sobre a presenza de Feijóo nas 'quinielas' de sucesión, esgrimiu que o presidente autonómico "ten un compromiso con Galicia" até 2020 que "está disposto a cumprir até o último minuto". Preguntado acerca de se o seu perfil sería o adecuado para liderar a renovación no PP, rexeitou situarse "sobre futuribles".

"PROFUNDA VERGOÑA"

Tellado admitiu que provoca "unha profunda vergoña" que houbese "persoas no PP que, a título individual, manchasen as siglas" do partido "facendo un dano inmenso a este proxecto político". "Esa vergoña dos militantes é evidente", constatou, pero tamén matizou que a sentenza afecta ao PP "por dous municipios concretos" e feitos que "sucederon hai unha década".

Sobre o feito de que tamén fose condenado Pablo Crespo, quen fora secretario de Organización do PPdeG, e a esixencia de explicacións por parte do BNG sobre a "ramificación galega", respondeu que a súa formación dá "explicacións" e é "transparente".

Pero preguntado sobre a petición dun pleno monográfico, ha replicado que "as sentenzas se dirimen nos xulgados". "Se o BNG quere facer un xuízo paralelo sobre algo que ocorre en dous concellos da Comunidade de Madrid, é unha forma moi curiosa de entender o autogoberno", ironizou.

Así mesmo, esgrimiu que dá a impresión de que o Bloque "non ten o pulso da realidade do que sucede en Galicia", cuxo Goberno está "centrado na recuperación económica". "Se o BNG quere falar da Gürtel, será que lle preocupan outras cousas", aseverou.

A continuación, sinalou que lle "chama a atención" do BNG "coa corrupción" e preguntouse por que a súa  portavoz, Ana Pontón, "non explicou o diñeiro que recibiron de Vendex nas súas contas correntes na Coruña, ou por que apoian a socialistas investigados noutros concellos".

DEFENSA DE RAJOY

Máis aló, Tellado reivindicou a "honradez e honorabilidade" de Rajoy e, preguntado acerca de se non supón un lastre para o papel que o partido poida xogar en futuros comicios, dixo que "sempre que xorden casos de corrupción e sentenzas" deste tipo "dánase a imaxe de toda a política".

"Pero a inmensa maioría das persoas que nos dedicamos á política somos honradas e honestas. Tratar de manchar a imaxe dun partido pola acción individual de determinadas persoas é un erro; danamos a democracia". Indígname a corrupción: toda, a do PSOE, pero especialmente e moito máis cando os casos se dan no meu partido", recoñeceu, antes de apelar a non usar este tipo de casos "como arma arreboladiza".

De Rajoy apuntou que é "un presidente centrado en gobernar" e subliñou que "participou como testemuña" no xuízo. "A sentenza non o sinala, non foi imputado e persoalmente non se lle imputa nada". Por iso, reivindicou non só a súa "honradez e honorabilidade", senón tamén "a súa xestión como o presidente que sacou da crise a España".

Após insistir en que "fallaron os mecanismos de control" no partido e en que toca "pedir desculpas", insistiu en que os tempos de renovación no PP débeos marcar o propio partido e non outros para evitar que suceda, por exemplo, "o que fixo o PSOE con Pedro Sánchez", que cualificou de "despropósito e circo".