Por Galicia Confidencial | Santiago de Compostela | 31/05/2018 | Actualizada ás 13:04
Afundación, a Obra Social de Abanca, continúa desenvolvendo a súa programación de actividades complementarias á mostra «A Arte no Cómic», exposta actualmente na Sede Afundación de Vigo (Policarpo Sanz, 24-26), co obxectivo de achegar ao público a novena arte desde múltiples perspectivas.
Este xoves 31 de maio, a partir das 19.00 horas, terá lugar o coloquio «Mulleres que fan cómic» incluído no ciclo de mesas redondas e charlas «A Arte no Cómic». Ana Galván, Begoña García-Alén e Rubén Romero participarán neste encontro no que conversarán sobre o papel da muller nesta arte, as súas derivas e a situación actual, ademais de falar sobre as súas últimas obras no mercado editorial. A asistencia é gratuíta previa inscrición no teléfono 986 120 078 ou nesta ligazón.
Finalizará este ciclo o encontro «O museo e o cómic» co prestixioso ilustrador e autor de cómic Sagar Forniés e o director de publicacións do Museo do Louvre, Fabrice Douar o 7 de xuño.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.