Por Galicia Confidencial | Santiago de Compostela | 20/06/2018 | Actualizada ás 11:39
A eclipse total de Lúa do 27 de xullo vai ser o principal fenómeno astronómico da estación estival que comeza este xoves 21 ás 12:07 horas. En Galicia, a Lúa sairá xa eclipsada totalmente sobre as 22.00 horas e continuará así ata as 23:13, cando comezará a eclipse parcial para rematar completamente o fenómeno ás 1:28 horas do día 28.
O director do Observatorio Astronómico Ramón María Aller, José Ángel Docobo, di que este verán se poderán observar tamén dúas eclipses parciais de Sol, o 13 de xullo e o 11 de agosto, “aínda que ningunha delas poderá contemplarse desde a Península”. As que si volven, puntuais coma cada ano, son as Perseidas, que se deixarán ver en condicións moi favorables as noites do 12 e 13 de agosto “xa que este ano coinciden coa Lúa en fase nova”.
Por outra banda, Venus ao solpor, e Xúpiter e Saturno visibles durante toda a noite, van ser os planetas que máis destacarán nos ceos nocturnos, dando lugar mesmo a curiosas conxuncións, como a do 23 de xuño e do 20 de xullo, datas en que a Lúa estará moi preto de Xúpiter, ou a do 30 de agosto con Venus e o noso satélite natural ao solpor.
UNHA PRIMAVERA FRÍA
No que respecta á meteoroloxía da estación que remata, segundo os datos recabados no Observatorio Universitario a primavera non resultou excesivamente chuviosa na contorna de Compostela, nin en cantidade (445,5 litros/m2) nin en número de días con precipitación (52). Con todo, non veu acompañada de moito calor. Rexistráronse “unhas temperaturas máximas máis ben baixas especialmente a finais de maio e comezos de xuño, preto dos 15º”, asegura Docobo. De feito, neste último mes anotouse unha temperatura máxima de só 13º2 o día 9, cousa que non sucedía desde había décadas. Tamén xuño destacou pola pluviosidade, con 111 litros/m2.
TODOCOSMOS
E para os máis afeccionados ao mundo da astronomía, o Observatorio Astronómico Ramón María Aller da USC, logo de acadar de novo financiamento por parte da FECYT, desenvolverá un ano máis nunha morea de concellos de Galicia o programa de divulgación astronómica TodoCosmos. Ademais, os sábados de xullo, agosto e setembro o persoal do Observatorio colaborará, como leva facendo dende os últimos dez anos, coa Cidade da Cultura no programa Visitas Astronómicas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.