O ámbito teatral centrará a segunda sesión das 'Escaramuzas artísticas' dos actores galegos, o mércores 27

A Asociación de actores e actrices de Galicia celebra o vindeiro mércores 27 de xuño a segunda sesión das súas 'Escaramuzas artísticas', unha serie de encontros de debate de periodicidade mensual en que voces especializadas nos sectores do audiovisual e da escena intercambian puntos de vista sobre diferentes temas.

As 'Escaramuzas artísticas' buscan ir "máis aló dos tradicionais coloquios", segundo destacan os organizadores, "rompendo as habituais distancias das mesas redondas e achegando un ambiente distendido e participativo".

Son encontros destinados tanto aos profesionais do sector como ao público xeral. A segunda sesión, ás 20,00 horas na Lasso-Cafetaría do Auditorio de Galicia de Santiago, centrarase no ámbito teatral e na adaptación dos textos dramáticos clásicos. A entrada é gratuíta até completar aforamento.