Por E.P. | Compostela | 01/07/2018 | Actualizada ás 21:20
O Valedor do Pobo executou a sentenza da Sala do Contencioso Administrativo do TSXG que anula o nomeamento da xefa de servizo de persoal pola que intercedeu a valedora, Milagros Otero, á que o tribunal atribúe un "desvío de poder" e unha actuación con "arbitrariedade" en favor da persona seleccionada para o posto, coa que garda relación.
A través dun comunicado emitido este domingo, dous días despois de coñecerse o fallo xudicial, a institución que dirixe Otero informa da anulación do nomeamento de María Puy Fraga, irmá do portavoz parlamentario do PPdeG, Pedro Puy, e filla dun catedrático de Dereito do que é discípula a valedora.
Así, anuncia que Puy Fraga cesa como xefa de servizo de persoal e, en cumprimento da sentenza, retrotrae o procedemento de selección, a través do sistema de libre designación, á fase de valoración dos candidatos, cuxos méritos, segundo recolle o fallo do TSXG, non foron tidos en consideración porque a institución actuou determinada a outorgar o posto á persona finalmente seleccionada.
"A titular da institución do Valedor do Pobo non participou no procedemento administrativo, e abstívose de intervir no mesmo, sendo substituída polo adxunto ao Valedor, en aplicación do que prevé á Lei do Valedor", indica a institución.
Con todo, o TSXG determina na súa sentenza que Milagros Otero continuou influíndo no proceso de selección a pesar de apartarse no inicio do mesmo. Ademais, só unha vez presentado o recurso por parte dun dos participantes no procedemento, a valedora recoñeceu que a súa decisión de dar un paso á beira debeuse a que mantiña relación cunha das candidatas, M.P.F.
No seu comunicado, o Valedor do Pobo reitera o seu respecto ás decisións xudiciais e afirma estar a estudar a posibilidade da presentación dun recurso, xa que a sentenza non é firme.
SENTENZA
Tal e como informou GC este sábado, a Sala do Contencioso Administrativo do TXSG anulou o nomeamento dunha persona para un posto de libre designación no Valedor do Pobo por irregularidades no proceso, no que, segundo o xulgado, a valedora, Milagros Otero, intercedeu para que o cargo recaese nunha persona coa que tiña relación.
O fallo, con data de 29 de xuño, estima o recurso presentado por un particular contra a resolución emitida en marzo de 2016 polo adxunto da valedora en substitución desta. Así, anula o nomeamento de María Puy Fraga --irmá do portavoz parlamentario do PPdeG, Pedro Puy-- como xefa de servizo de Administración e Persoal da institución polo método de libre designación e ordena a repetición do proceso.
Así, o xulgado determina que a selección desta persona "non se guiou" polos criterios de "igualdade, mérito e capacidade", senón "polo desexo de adxudicalo a unha das candidatas" e "con desprezo" ao resto de aspirantes, cuxos méritos e documentación "nin sequera se tomaron en consideración".
Segundo a sentenza, a valedora do Pobo, Milagros Otero, cometeu "desvío de poder" e "arbitrariedade" ao intervir no proceso con "interese de que fose seleccionada a señora P.F.", todo iso a pesar de que se abstivo de participar no procedemento "sen chegar a especificar" as causas para facelo.
Unha vez iniciado o proceso xudicial de reclamación, a valedora recoñeceu que o motivo que a levou a apartarse do proceso era que Otero é discípula dun catedrático de Dereito que é pai de Puy Fraga, persona que se fixo co posto e cuxa designación anula agora o TSXG.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.