O líder do PSdeG insta a Feijóo a "tomar medidas" e "ser exemplo" após o caso de 'enchufismo' da valedora do Pobo

O secretario xeral do PSdeG, Gonzalo Caballero, instou ao presidente da Xunta de Galicia, Alberto Núñez Feijóo, a "tomar medidas para ser exemplo de capacidade, de dignidade, de honradez e de total limpeza en calquera proceso de ámbito público", após a sentenza que anula un nomeamento feito pola valedora do Pobo, Milagros Otero.

Caballero criticou que a sentenza "pon en dúbida a eficacia, a xustiza e a igualdade de oportunidades", en declaracións este luns en Ourense despois de percorrer as rúas céntricas da cidade das Burgas acompañado por militantes socialistas da urbe.

"Desde o grupo parlamentario socialista estamos a activar hoxe mesmo todas as actividades de acción e todas as medidas para que a valedora do Pobo renda contas no Parlamento galego e para que asuma responsabilidades políticas por unha sentenza de enorme gravidade", engadiu.

Así mesmo, o líder dos socialistas de Galicia urxiu ao presidente da Xunta a que se poña "en atención aos problemas dos galegos e das galegas", xa que "leva varias semanas centrado noutros ámbitos de decisións propias do Partido Popular".