Un informe do IGE sinala que o volume de prestacións sociais é superior ás cotizacións sociais netas

A renda dispoñible bruta dos fogares galegos foi de 37.743 millóns de euros en 2015, o que supón un incremento do 1,2% respecto ao ano anterior, pero segue aínda un 0,95% por baixo da de 2011, segundo os datos que publica este venres o Instituto Galego de Estatística (IGE).

As contas do sector fogares explican, ademais, que este crecemento "non responde tanto a un crecemento das rendas primarias dos fogares senón, principalmente, a unha caída dos impostos e a un incremento das prestacións sociais que perciben, principalmente en forma de pensións de xubilación e tamén prestacións de desemprego, que veñen compensar a caída das rendas primarias".

Mentres, a renda dispoñible bruta por habitante en 2015 foi de 13.838 euros, un 1,7% máis elevada que no período anterior, e tamén superior, aínda que en menor medida (un 0,7%) que a de 2011. Así, o IGE sinala que nos últimos anos da serie 2010-2015 a renda dispoñible bruta dos fogares está a medrar, aínda que "a un ritmo menor do que o fai a economía".

Así mesmo, nos anos en que a economía tivo crecementos negativos, a renda tivo pola contra "un mellor comportamento relativo" polo efecto redistribuidor das prestacións sociais, segundo explica.

21% DO PIB

O valor engadido bruto xerado polos fogares como colectivo en 2015 foi de 12.186 millóns de euros, o cal supón o 21,4% do produto interior bruto (PIB) de Galicia, un 0,1% máis que no período anterior.

Con todo, a achega do sector institucional fogares ao total da economía chegou a representar o 23% do valor xerado na economía galega en 2013.

CAE O SALDO DAS RENDAS PRIMARIAS

En 2015, por primeira vez na serie, o saldo das rendas primarias non é maior que a renda dispoñible bruta. Isto significa, apunta o IGE, que os recursos (prestacións sociais e outras transferencias correntes recibidas) son superiores aos empregos (impostos correntes sobre a renda e patrimonio, cotizacións sociais e outras transferencias correntes pagas).

Ademais, a remuneración dos asalariados representa un 47,6% dos recursos totais dos fogares, o excedente de explotación e a renda mixta achegan o 19,4% dos recursos, mentres as prestacións sociais alcanzan un 23,1%.

As outras transferencias correntes (que inclúen bolsas de estudo, remesas de emigrantes, transferencias entre fogares e outras rendas) e rendas da propiedade achegan un 9,9% dos recursos.

MÁIS PRESTACIÓNS QUE COTIZACIÓNS

O 53,7% dos empregos totais do sector fogares en 2015 son cotizacións sociais, isto é, achegas dos fogares aos sistemas de prestacións sociais. Séguenlle en relevancia os impostos sobre a renda, o patrimonio, etcétera, cun peso no total dos gastos do 26,7%.

O volume de prestacións sociais, por último, é superior ás cotizacións sociais netas en todo o período, e o diferencial, segundo advirte Estatística, foise incrementando. O cociente entre cotizacións sociais e prestacións sociais foi do 66% no ano 2015, cando no inicio do período era do 76%.