Achégase o Festival de Ortigueira, un dos máis icónicos do país

O Festival do Mundo Celta de Ortigueira celebra este ano o seu 40 aniversario como un dos festivais máis icónicos de Galicia e coa idea de continuar a súa traxectoria asociada á "calidade" coa participación de artistas como Milladoiro, Ímar, Yves Lambert Project ou Lúnasa.

O certame, que chegou a congregar ata 70.000 persoas nesta localidade coruñesa, arrancará este xoves e estenderase ata o día 15 con actuacións de folk celta chegadas dende distintos puntos do mundo. En concreto, os escoceses Ímar serán o prato forte da primeira xornada, este xoves, que contará tamén coa actuación dos finalistas do Proxecto Runas: os polacos Beltaine, os cántabros Brumafolk e The Taverners, de Castela e León.

O 13 de xullo, venres, será a quenda dos irlandeses Kila e The National Youth Pipe Band of Scotland, así como o asturiano Rubén Alba e a Escola de Gaitas de Ortigueira. O sábado, día 14, o prato forte do festival é, ademais de Milladorio - que se subirá aos escenarios ás 23.30 horas -, o concerto dos canadenses Yves Lambert Project, que actuarán a continuación e antes do irlandés Gabriel G. Diges. Os galegos Vos d'Abaixo abrirán esta xornada.

O peche do festival, o día 15, correrá a cargo dos irlandeses Lúnasa, que actuarán ás 23,30 horas e darán paso, sobre as 1,00 horas da madrugada, a The Celtic Social Club. Antes será a quenda de 'Airiños de Fene'.