A CIG denuncia que o profesorado "perde poder adquisitivo" co incremento salarial dos funcionarios

A CIG cifrou nun 0,8% a perda de poder adquisitivo do profesorado nos últimos seis meses, posto que o incremento salarial para funcionarios acordado entre os sindicatos estatais --CC.OO., UGT e CSIF -- e o Goberno de España, que establece unha subida do 1,5%, é inferior ao aumento do IPC, un 2,3%.

Así o denunciou a central nacionalista nun comunicado, á vez que lembrou que, despois da firma do convenio, "xa dixo que era un pésimo precedente" desvincular os soldos dos prezos de consumo. Ademais, incidiu en que na segunda metade de ano os funcionarios terán unha subida dun 0,25%, o que supón que en setembro acumularán un 1,75% do incremento "cando todas as previsións do IPC a finais de ano superan o 2%".

Por iso, a CIG demandará á ministra de Facenda, María Jesús Montero, un plan de recuperación de poder adquisitivo no que a central ve prioritario unha cláusula de revisión salarial que impida que os soldos estean por baixo do IPC. En segundo lugar, a CIG ve "fundamental" revisar o acordo asinado en marzo e conseguir unha "auténtica recuperación" de soldos "despois de nove anos de sangría retributiva" tanto para os docentes como para o resto de traballadores públicos, segundo criticou o sindicato.

De igual modo, manterá o seu rexeitamento ao tope do 0,3% "que o Estado lle permite ás diferentes administracións para mellorar o raquítico acordo estatal", á vez que instou á Xunta a "asumir unha negociación" que leve ao profesorado galego á "recuperación dos recortes" que o Goberno autonómico converteu "nos maiores do Estado".