En Marea pide reabrir as axudas da Xunta para infraestruturas municipais con "criterios claros e obxectivos"

O deputado e viceportavoz de En Marea, Antón Sánchez, esixiu este martes reabrir, con baremos "xustos e igualitarios", a convocatoria de subvencións da Consellería de Medio Ambiente e Ordenación do Territorio destinadas a que os concellos creen ou melloren infraestruturas municipais.

Nun comunicado, o partido instrumental explicou que a convocatoria se abriu a medianoite e tardou "tan só doce minutos en esgotarse por completo". E é que, ao ser unhas subvencións en réxime de concorrencia competitiva, a repartición realízase por orde de petición.

Ante iso, Antón Sánchez dixo "temer" que a Xunta "poida filtrar información privilexiada a consistorios amigos". "En vista de feitos recentes, como a sentenza do Tribunal Superior de Xustiza de Galicia (TSXG) por trato de favor da valedora do Pobo (..) e a que obrigou a anular as 69 prazas dun concurso interno da Deputación de Ourense", o deputado lamenta que "poida tratarse dun novo caso de uso clientelar das institucións".

"Non poden facer así as cousas. A concorrencia non competitiva non é dar axudas aos correlixionarios, amigos e fillos de amigos. E a xestión de axudas da señora Beatriz Mato (conselleira de Medio Ambiente e Ordenación do Territorio) parece seguir ese criterio", espetou Antón Sánchez.

Así as cousas, En Marea reclama que a convocatoria para acceder a estas subvencións se reabra" cunha ampliación de crédito" que inclúa uns baremos "que garantan unha repartición de fondos realizado segundo criterios claros e obxectivos".

"Demandamos que non se volvan a repetir este tipo de prácticas ás que nos ten habituados o PP. E esperamos tamén que, para a apertura desa nova convocatoria, exista un diálogo previo cos concellos a través da Federación Galega de Municipios e Provincias (Fegamp)", demandou o deputado.