Por Galicia Confidencial | Santiago de Compostela | 21/07/2018 | Actualizada ás 11:00
A Assembleia Nacional Galega (ANG) convoca por primeira vez o Premio "Estudante Galeguista do Ano" co patrocinio da Libraría Pedreira de Compostela, a Libraría Cartabón de Vigo, a Libraría Suévia da Coruña e a Libraría Trama de Lugo. Os obxectivos do premio son "potenciar na mocidade o uso da língua galega, a excelência académica e o compromisso e ativismo com a defesa da língua, da cultura e da sociedade galega", asegura a ANG, unha asociación cultural e cívica de carácter galeguista e non vinculada a ningunha organización política que traballa polos vínculos con Portugal e o Brasil.
A este premio pode acceder calquera alumno ou alumna de entre 16 e 30 anos que curse estudos de secundario nun centro público ou calquera alumno ou alumna que realice estudos superiores nun centro público galego, que redisa en Galicia, no Bierzo, no Eu-Návia ou nas Portelas. O agasallo será un diploma acreditativo como "Estudante Galeguista do Ano 2018" e un lote de libros e discos galegos.
O prazo de entrega da documentación remata o 2 de setembro e o 9 de setembro anunciarase a decisión do xurado, que estará formado pola Coordinadora da ANG e/ou persoas relevantes da cultura e do galeguismo. Entre os aspectos que se valoran está o do uso habitual do idioma galego, ter estudos de Galego ou portugués nunha Escola de Idiomas durante o último curso, participar na organización de actos relacionados coa promoción da lingua... entre outros. As bases completas poden consultarse na súa páxina web ou no Facebook.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.