O BNG presume de ser o motor do cambio político en Galicia na manifestación do Día da Patria
Os nacionalistas aparcan as reivindicacións de independencia no lema do 50 aniversario da tradicional marcha nacionalista pola capital Galicia e apostan polo lema: "Unha idea clara. Sumar por Galicia".
Por E.P. | SANTIAGO DE COMPOSTELA | 25/07/2018 | Actualizada ás 13:04
Miles de persoas acudiron este mércores á chamada do BNG a manifestarse polas rúas de Santiago o Día da Patria Galega, co obxectivo de converter esta xa tradicional mobilización no "catalizador das ganas de cambio político" que hai en Galicia.
Tal e como proclamou, ao comezo da marcha na Alameda compostelá ao mediodía, a portavoz nacional do BNG, Ana Pontón, o goberno da Xunta está "sen ideas, desganado e cun presidente que parece que está aburrido de presidir Galicia".
Entre son de gaitas e pandereitas e con cánticos como 'Quen queira, quen non, Galicia é unha nación', 'Independencia', 'Galicia ceive, poder popular' ou 'Galicia, mañá, República será', os manifestantes percorren as rúas compostelás até chegar á praza da Quintana, presididos por unha pancarta na que pode lerse "Unha idea clara. Sumar por Galicia".
