O TSXG ratifica a condena de 47 anos de cárcere para o autor do dobre crime de Arbo

O Tribunal Superior de Xustiza de Galicia (TSXG) ditou sentenza na que desestima o recurso de apelación interposto pola defensa de Arturo D.S., condenado en novembro 2017 por asasinar á súa exparella e ao que era entón o seu noivo a 47 anos de prisión, e confirmou esa sentenza, ditada pola Audiencia Provincial de Pontevedra tras un veredicto de culpabilidade dun tribunal de xurado.

No seu recurso, a defensa argumentaba que se vulnerou a presunción de inocencia do procesado, xa que o xurado estimara as probas máis prexudiciais para Arturo D.S., ignorando outras que, na súa opinión, éranlle favorables. Así mesmo, esgrimía que se aplicaron indebidamente as regras de fixación da pena.

O alto tribunal galego sinalou que a proba de cargo foi "convenientemente avaliada" polo xurado e que as manifestacións de testemuñas no xuízo "mostran a realidade da obsesión de Arturo" coas vítimas. A iso únese a "ausencia de coartada crible" e de datos "que determinen de modo inequívoco" que o xurado fixese unha apreciación errada.

Por outra banda, tamén rexeita o argumento de que non se aplicaron correctamente as penas, nas que se tiveron en conta as circunstancias agravantes de lugar e tempo, e de parentesco (no caso da muller).

CONDENA

Arturo D.S. foi condenado a 47 anos de cárcere polo asasinato da súa exparella (con quen tiña unha filla) e do noivo da muller, aos que disparou cunha escopeta cando estaban no interior dun vehículo, nunha zona forestal de Arbo (Pontevedra).

A sentenza da Audiencia considera probado que o acusado estaba obsesionado coa súa exmoza, á que espiaba e acosaba. Segundo esa resolución condenatoria, na madrugada do 3 de xullo de 2016, Arturo presentouse nunha zona forestal onde sabía que se atopaban a súa exparella e o noivo dela, e alí disparoulles na cabeza.