Por Galicia Confidencial | Compostela | 05/08/2018 | Actualizada ás 22:19
A Xunta segue utilizando o diñeiro público para encher as contas dos grandes medios de comunicación. Pero, desta volta o diñeiro xa non é só dos galegos, senón de todos os europeos. E o certo é que a Consellería de Facenda gastará case 1,2 millóns de euros (con IVE) en dúas campañas financiadas case na súa totalidade con fondos da UE.
Trátase de dúas campañas de "promoción dos servizos públicos galegos". Unha do Programa Operativo FEDER "Unha maneira de facer Europa", financiada a cargo deste programa Galicia 2014-2010 nun 80% e a outra do Programa Operativo Fondo Social Europeo (FSE) "inviste no teu futuro", tamén financiada nun 80% a cargo do FES de Galicia 2014-2020. O outro 20% será aportado con fondos públicos galegos.
O obxectivo destas campañas financiadas por Europa é "poñer en valor o catálogo de servizos públicos existentens" en Galicai e "sensibilizar á sociedade sobre a súa labor". Tamén informar sobre os programas FEDER e FSE para "sensibilizar á sociedade sobre os benefricios destes recursos e dos investimentos que están a financiar". Pero a xunta aproveita a partida tamén para impulsar outra campaña para "sensibilizar á cidadanía" sobre a Axencia Tributaria de Galicia.
A Xunta defende este tipo de campañas propagandísticas porque asegura que estas "accións de difusión" permiten trasladarlle aos galegos "os avances, resultados e beneficios que se van producindo no perído de execución dos programas operativos FEDER e FSE, así como a actividade desenvolvida coa axuda dos fondos da UE en Galicia".
Deste xeito, realizará catro ondadas publicitarias só para os grandes medios galegos. A maior parte deses cartos, entre un 40 e un 55% irá para os medios en papel, e entre un 20 e un 35% para as edicións dixitais dos mesmos medios con edicion impresa. Deste xeito, os xornais tradicionais poderán levar case o 80% do importe total desta campaña financiada con fondos europeos.
Outro millón de Turismo
Por outra banda, Turismo de Galicia tamén gastará este agosto 900.000 euros da partida de plan de medios da campaña de promoción dos recursos naturais, culturais e gastronómicos de Galicia durante 2018. Unha partida que este 2018 foi de 8,2 millóns de euros con IVE.
Unha cantidade que aumentou en dous millóns con respecto ao 2017 e que será xestionada por 11 empresas publicitarias diferentes que serán as que contratarán as campañas nos medios de comunicación, especialmente, nos medios preferentes do Goberno galego.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.