Santiago achega a figura de Alejandro de la Sota, o arquitecto pontevedrés "obsesionado coa natureza"

Simplificar a complexidade da súa arquitectura porque "os seus escritos son moi densos pero conteñen axiomas moi sinxelos" e achegalo á sociedade galega porque o pontevedrés Alejandro de la Sota é "moito máis coñecido fóra do país que en Galicia". Esa é a finalidade da mostra "Alejandro de la Sota 1913-1996", deseñada polo Colexio Oficial de Arquitectos de Galicia, que acolle a Alameda de Santiago e que poderá visitarse até o vindeiro día 19. 

“Por que é máis patrimonio a vella cidade que unha praia ou unha paisaxe virxe?” dixo o arquitecto galego nunha entrevista sobre Arne Jacobson. Nesta, entre outras ideas, un pode profundar no “Ano Sota”. É dicir, no ano dedicado ao arquitecto da Casa Domínguez en Poio, do Pavillón municipal de Pontevedra, do Goberno Civil de Tarragona e da Central Leiteira Clesa en Madrid. Ou mesmo os Talleres Aeronáuticos de Barajas, xa que pontevedrés interesábanlle “os novos materiais” para poder crear “novas arquitecturas”.

Porque a Real Academia de Belas Artes Nosa señora do Rosario dedica este ano o “Día das Artes Galegas” ao arquitecto pontevedrés, expoñente dun racionalismo equilibrado que unía creatividade arquitectónica e simplicidade construtiva. Autor de edificios que combinan “un gran rigor xeométrico, con liñas claras e rectas, coa audacia nas estruturas”. 

A MOSTRA

Unha exposición que se inaugura a través de distintas aproximacións: os espazos para habitar, os espazos para a industria, os espazos civís, os espazos para a docencia e o mobiliario. E faino a través do seu ideario e dando a coñecer o seu proceso creativo "que se podería aplicar a calquera outra arte". Nun ideario no que hai unha idea forte: a idea de transportar unha arquitectura tradicional e popular a unha arquitectura de autor. Unha arquitectura de autor obsesionada pola natureza, por integrar a vivenda nunha contorna grazas a unha tecnoloxía que nolo permite porque, como dicía o arquitecto: “o que rexeita a natureza é a arquitectura mala, a natureza admite as xeometrías”.

No acto de inauguración participaron: o alcalde de Santiago, Martiño Noriega; a vicepresidenta da Deputación da Coruña, Goretti Sanmartín; a xerenta do Consorcio de Santiago, Belén Hernández, e demais autoridades. O acto consistiu nun percorrido polos bloques temáticos da  exposición, a cargo dun rexedor acompañado polos organizadores da mesma. Tamén estivo Juan de la Sota, o fillo do arquitecto, que explicou aspectos da arquitectura do seu pai. "Estudiar a contorna, ver e entender", afirmou de la Sota cando relatou que as formas dunha silla deseñada polo arquitecto foran inspiradas polas "pinzas do moño da miña nai".