Compromiso de Opel para entregar os coches a compradores afectados polo peche de Motorkar l

Os clientes do que foi até hai uns meses concesionario oficial Opel na comarca de Ferrolterra, Motorkar, recibirán os seus vehículos antes de que finalice o actual mes de agosto. A solución a este conflito foi posible grazas á firma dun acordo en Madrid entre Opel, a firma Motorkar e a entidade de crédito Cetelem. Os afectados son aproximadamente unha corentena, algúns dos cales pagaron hai meses os seus vehículos e non os chegaron a recibir, mentres que outros están a abonar os créditos asinados para facer fronte ao pago dos automóbiles, que tampouco percibiron. Tras protagonizar diversas concentracións, entrevistas con grupos municipais, aprobación de mocións en plenos e recibir o apoio de partidos políticos e da Xunta, precisamente, a mediación da Dirección Xeral de Comercio foi fundamental para solucionar este asunto.

RENUNCIA A EMPRENDER ACCIÓNS XUDICIAIS

Agora, segundo detallou unha das afectadas, trasladóuselles que "antes de que acabe agosto, e entre en vigor a nova normativa de emisións, entregarán os vehículos, co compromiso de renunciar a emprender calquera tipo de acción xudicial contra a marca, incluídas as reclamacións por danos e prexuízos". De todos os xeitos, desconfía deste compromiso: "Xa non me fío de nada nin de ninguén, xa que nos din que todo está acordado, pero eu ata que vexa o coche no meu poder e coa documentación na guantera, non me fío".

Segundo lles trasladaron aos afectados será Opel a que se fará cargo da entrega dos vehículos, cuxos automobilistas os deberán recoller no concesionario oficial da cidade da Coruña. A "estafa" saíu á luz pública a finais de xuño, cando Motorkar pechou por sorpresa as tres instalacións que tiña en Ferrolterra, nos municipios de Ferrol e Cabanas (A Coruña), aplicando un ERE extintivo para todos os seus empregados, estando previsto que nos próximo días presente concurso de acredores, unha vez sexan entregados todos os vehículos.