Presentan a edición facsímil da carta coa que Colón anunciou o descubrimento de novas terras
É un texto breve de catro páxinas onde o almirante describe como son as novas terras ás que chegou.
Por E.P. | SANTIAGO DE COMPOSTELA | 09/08/2018 | Actualizada ás 19:26
Un facsímile d'A carta de Colón anunciando o descubrimento do Novo Mundo' foi presentada este xoves en Pontevedra con motivo do 525 aniversario da súa primeira publicación en 1493. No acto no Museo de Pontevedra estiveron, entre outros, Cristóbal Colón de Carvajal y Gorosábel, descendente do descubridor e autor do estudo histórico e transcrición anotada da obra; o presidente do Consello Social da Universidade de Vigo, Ernesto Pedrosa; o alcalde de Baiona, Ángel Rodal Almuíña; e o editor da Taberna Libraria, Dionisio Redondo.
Así, o duque de Veragua destaca que esta reprodución facsímile é "o documento máis importante da historia da humanidade, debido á transcendencia do feito que afectou ao devir de todos os habitantes do planeta Terra". En concreto, trátase dun breve texto de catro páxinas nas que o almirante plasmou a descrición das terras e as xentes que atopou alén do océano, nun relato orixinal, áxil e ameno.
O motivo de que se presente en Galicia é debido a que coa arribada da carabela 'Pinta', a poboación de Baiona tivo a primicia da noticia do descubrimento. Os 525 exemplares que se editaron levan a rúbrica e certificación a cargo de Cristóbal Colón XX. Pola súa banda, o venres, 10 de agosto, presentarase esta carta na Casa de Navegación de Baiona (20,30 horas), onde o descendente de Colón ditará a conferencia 'A vida a bordo da carabela Pinta'.
