Centos de persoas reclaman a abolición da tauromaquia cunha manifestación en Pontevedra
Convocados polo colectivo 'Touradas fóra de Pontevedra', a marcha estivo encabezada por unha pancarta co lema 'A tortura non é arte nin cultura'.
Por E.P. | PONTEVEDRA | 11/08/2018 | Actualizada ás 21:10
Centos de persoas convocadas polo colectivo 'Touradas fóra de Pontevedra' reclamaron a abolición da tauromaquia cunha marcha que percorreu as rúas do centro da cidade, na que desde o día 5 celébrase a súa tradicional feira de touros.
A protesta, que se iniciou ás oito da tarde na praza da Peregrina, estivo encabezada por unha pancarta co lema 'A tortura non é arte nin cultura'. Os seus participantes corearon cánticos como 'Xa abonda de malos tratos animais' e 'Tauromaquia abolición'.
A portavoz do colectivo 'Touradas fóra de Pontevedra', Victoria Estévez, valorou que "o Concello de Pontevedra dese un paso importante ao declararse antitaurino", en alusión a unha recente moción aprobada no pleno da corporación.
No entanto, esixiu "que termine dunha vez o convenio cos irmáns Lozano", os empresarios que xestionan a praza de touros, tamén chamada Coso de San Roque, que o goberno local ten alugado para realizar os torneos medievais durante a 'Feira franca' e na que este mes de agosto se celebran tres corridas de touros e un espectáculo de cabalos españois.
A pesar disto, Victoria Estévez mostrouse "optimista" ante a posibilidade de conseguir os obxectivos que perseguen os colectivos antitaurinos, presentes coas súas reivindicacións desde hai dez anos en Pontevedra e xerando un debate que "está moi presente", a pesar "da presión do lobby taurino".
En todo caso, dirixiu as súas críticas ao Partido Popular, censurando a negativa do goberno autonómico a modificar a Lei de protección animal, para que se equipare os touros co resto de especies que están amparadas por esta lexislación.
"Temos claro que mentres non botemos a Partido Popular da Xunta non imos conseguir nada", aseverou, avanzando que ante a próxima convocatoria electoral se incrementará a presenza dos colectivos antitaurinos para instar á cidadanía a esixir a modificación da lei.
Na manifestación participaron tamén representantes doutros colectivos, como o partido animalista Pacma ou Galgos 112, ademais de membros de En Marea de Pontevedra. O manifesto final foi lido por Begoña Llácer, filla da escritora María Victoria Moreno, recoñecida este 2018 no Día das Letras Galegas.
