300.000 euros de axuda para a recuperación de terras abandonadas en Lugo

O Presidente da Deputación, Darío Campos Conde, informou este martes que o Goberno Provincial puxo en marcha unha liña de axudas para a recuperación de terras abandonadas cun valor total de 300.000 euros, “coas que dende este Goberno Provincial reafirmamos o noso compromiso cos gandeiros e agricultores da provincia”, destacou. Este diñeiro estará dirixido a gandeiros e agricultores a título individual; agrupacións de produtores; SATs ou persoas xurídicas coa titularidade de explotacións, que dispoñan dun mínimo dunha hectárea de superficie, ben en réxime de propiedade, aluguer, ou froito dunha cesión ou doazón.

“Trátase dunha liña que dende este Goberno volvemos ofrecer porque así mo trasladaron persoalmente os produtores da provincia e coa que continuamos a poñer en valor o rural da nosa provincia. O compromiso deste goberno co rural non é un slogan, senón unha realidade que se demostra con feitos coma este”, asegura Campos.

Os beneficiarios desta iniciativa recuperarán así as terras baldías con actividades agrícolas ou gandeiras. As plantacións forestais non están subvencionadas. A axuda por hectárea é de 500 euros, podendo recibir cada beneficiario ata 9.000 euros. Logo da aprobación das bases destas axudas, terán que ser publicadas na Base Nacional de Subvencións e logo no Boletín Oficial da Provincia. A previsión é abrir o prazo de presentación de solicitude nos vindeiros 15 días.

CASE 1200 HECTÁREAS RECUPERADAS

Campos Conde lembrou que esta é unha liña de axudas "totalmente pioneira"  que o Goberno da Deputación puxo en marcha durante os anos 2014 e 2015. Deste xeito, e tan só durante estes dous anos, o Executivo Provincial ofreceu axudas por valor de case 560.000 euros coas que un total de 178 agricultores e gandeiros lucenses puxeron en produción case 1.200 hectáreas de terreos baldíos na provincia de Lugo.