O programador do Armadiña Rock non ve responsable á organización do Marisquiño polo derrube do paseo de Vigo
Este festival celebrará en Combarro (Poio) a súa décima edición do 24 ao 26 con artistas como La Pegatina, Amparanoia, Sés e Terbutalina.
Por E.P. | SANTIAGO DE COMPOSTELA | 14/08/2018 | Actualizada ás 17:39
O programador de eventos Alfonso Vilanova, un dos organizadores do festival Armadiña Rock, sinalou que "alguén terá que depurar nalgún momento" as "consecuencias" que se deriven do accidente ocorrido na clausura do Marisquiño, ao ceder parte do peirao onde se celebraba o último espectáculo. "Quen está a pagar é a organización e non me parece xusto", afirmou Vilanova a título persoal, argumentando que "parece que os responsables son eles, cando están nun espazo onde lles deron autorización". "Facer un evento non é nada sinxelo", insistiu Alfonso Vilanova, en alusión á tenencia dun seguro e a superación dos "controis" necesarios para acreditar a capacidade da organización.
No entanto, agregou que "pode pasarlle a calquera", pois "ninguén está libre de que lle poida suceder algo así", sobre a posibilidade de que se produza "un erro nunha infraestrutura". Ao destacar que a afluencia de público no momento do colapso da estrutura estaba "por baixo do aforamento" máximo permitido, Vilanova precisou que "por sorte non foi tan grave ao que puido pasar", en referencia aos máis de 400 feridos rexistrados como resultado do derrube.
Para o programador do Armadiña Rock, o obxectivo deste tipo de festivais é "que a xente estea coa maior seguridade posible, que veñan gozar e pasalo ben". "Por sorte, A Chousa é de pedra e non afunde", engadiu, sobre a praza de Combarro onde se celebrarán os concertos programados do 24 ao 26 de agosto.
PROGRAMACIÓN
O grupo catalán La Pegatina e o madrileño Amparanoia son os invitados para dar forma ao cartel da décima edición do Armadiña Rock Estrella Galicia, onde tamén actuarán Sés, Terbutalina, a Banda Xangai, Zënzar, Sonoro Maxín, The Lákazans, Skándalo GZ, A Banda da Loba, Noite Datada, Dudecan e Voodoo. Para Alfonso Vilanova, trátase dun "ano especial" na historia deste festival, que xurdiu para recadar fondos destinados ao equipo de fútbol local. Desde entón converteuse nun "referente a nivel galego", sendo "o terceiro en número de asistentes".
Ademais da programación musical, tamén haberá actividades para público infantil e familiar, conferencias e teatro, sempre "en contacto" coa lingua galega, para que Combarro sexa "un punto de referencia a nivel cultural, non só turístico", precisou. Outra das organizadoras, Tamara Andrés, explicou que a zona de acampada gratuíta instalarase na zona da Reiboa, próxima á dos concertos. Trátase de "un festival que non deixa de crecer", ao que contribúe o "traballo inxente" da Asociación Armadiña, co apoio do Concello de Poio, a Deputación de Pontevedra, a Xunta e empresas como Estrella Galicia, entre outros patrocinadores.
Como novidade, instalarase un 'punto morado', atendido por traballadoras sociais e persoal especializado. Ademais, Alfonso Vilanova resaltou que nesta ocasión o 70 por cento dos grupos "teñen como mínimo unha muller" na súa formación, unha tendencia que confía en que chegue a alcanzar o cento por cento en próximos anos. Pola súa banda, o deputado delegado de Cultura, Xosé Leal, destacou do Armadiña Rock Estrella Galicia que "engloba todas as características dun festival galego" na súa aposta pola música, a cultura e a igualdade. O alcalde de Poio, Luciano Sobral, incidiu en que durante a celebración desta cita musical que xa é un "referente" a nivel autonómico e estatal, "miles de persoas" reuniranse en Combarro.
