Unha ONG prepara cinco embarques para o avistamento de cetáceos na costa galega

A ONG galega CEMMA, Coordinadora para o Estudo dos Mamíferos Mariños, iniciará este xoves unha campaña de monitorización e avistamento de cetáceos, que se prolongará en agosto e setembro, co obxectivo de comprobar a presenza destas especies en augas galegas.

A primeira das campañas iniciarase este xoves día 23, con saída de Vigo. A continuación, están programados embarques o día 30 de agosto e o 8 de setembro, para os que non hai prazas dispoñibles, tamén desde Vigo. Desde O Grove, haberá saídas o 27 de agosto e o 5 e o 10 de setembro.

As campañas están autorizadas, segundo destaca a organización, como actividade de avistamento de cetáceos pola Secretaría de Estado de Medio Ambiente. O obxectivo principal, expón a ONG nun comunicado, é "incorporar información sobre a presenza e distribución dos cetáceos da plataforma de Galicia, mediante a monitorización a través da realización de embarques".

Así, coa participación dos asociados de CEMMA, pero tamén do público en xeral, a gastos compartidos, poderase realizar a campaña. Calquera persoa interesada pode participar independentemente dos seus coñecementos sobre o mar. CEMMA comprométese a asumir os criterios de estudo, recibindo formación técnica mínima e información sobre educación ambiental mariña, en xeral, e sobre os mamíferos mariños en particular.

A entidade realizou desde o ano 2003 até 2011 un total de 125 embarques, cunha media anual de 14, nos que acadou os 398 avistamentos de cetáceos, cunha relación media dun avistamento cada 2,4 horas de navegación ou 28,6 quilómetros percorridos. A falta de financiamento, en cambio, "truncou este traballo rutineiro".

CEMMA colabora desde 1999 coa Xunta de Galicia na asistencia e recuperación dos mamíferos mariños que varan no litoral galego, así como na recuperación dos animais feridos e no seu estudo poboacional.