Os incendios activos no parque natural de O Invernadoiro afectan a 94 hectáreas

Os dous incendios forestais que están activos desde a tarde do mércores no parque natural de O Invernadoiro, en Vilariño de Conso, afectan xa a preto de 94 hectáreas, segundo os datos facilitados pola Consellería do Medio Rural. Na extinción de ambos incendios, rexistrados na parroquia de San Mamede de Hedrada, participaron desde o seu inicio o mércores, ao redor das 16,10 horas, un total de 4 técnicos, 30 axentes forestais, 74 brigadas, 32 motobombas, 4 pas, 14 helicópteros e 7 avións.

No incendio de maiores dimensións, que se sitúa nunha zona inaccesible para os servizos de extinción terrestres, é necesaria a intervención con medios aéreos. Afecta, segundo as estimacións de Medio Rural, a preto de 80 hectáreas. O segundo dos incendios, que se iniciou a apenas 500 metros do primeiro, queimou preto de 14 hectáreas.

O xoves, o Ministerio de Agricultura, Pesca e Alimentación enviou un amplo dispositivo de medios aéreos e humanos para apoiar aos efectivos galegos na loita contra estes incendios. O dispositivo despregado o xoves supuxo a participación de 3 avións anfibios Canadair, de 5.500 litros de descarga, desprazados desde a base de Lavacolla; e un cuarto procedente de Matacán (Salamanca). Tamén un helicóptero Kamov, con capacidade de descarga de auga de 4.500 litros, da base de Ibias (Asturias).

No dispositivo, e co fin de participar nos labores de coordinación, tamén se incluíu un Avión de Comunicacións e Observación, procedente da base de León, e unha Unidade Móbil de Análise e Planificación, desprazada desde a base de Ourense. Ademais, para complementar desde terra o labor de extinción, traballaron na zona do incendio dúas Brigadas de Reforzo contra Incendios Forestais, procedentes das bases de Laza (Ourense) e Tineo (Asturias). Cada unha delas conta con dous helicópteros biturbina con capacidade de descarga de 1.200 litros.